Aşgabatdan Bangkoga we Pekine howa gatnawlary wagtlaýyn ýatyryldy

Türkmenistan Hytaýda koronawirusyň ýaýramagy sebäpli, 6-njy fewraldan Bangkoga (Tailand) we 7-nji fewraldan Pekine howa gatnawlaryny wagtlaýyn bes edýär. Ýörite howa gatnawy bilen Hytaýda bar bolan türkmen raýatlary Türkmenistana getiriler. Bu barada «Türkmenistan» awiakompaniýasynyň» resmi saýty habar berýär.
Uçuşlaryň näçe wagtlyk ýatyrylýandygy heniz nämälim. Bangkoga we Pekine iň soňky uçuşlar hem-de bu şäherlerden Aşgabada iň soňky uçuşlar 2-nji fewralda ýerine ýetiriler.
«China Southern Airlines» kompaniýasynyň Urumçydan Aşgabada gatnawlara çäklendirme girizjekdigi barada heniz maglumat ýok.
Howa gatnawlarynyň dikeldilmegi barada goşmaça habar berler.
Şeýle hem fewral aýyndan Kuala-Lumpura (Malaýziýa) ýola goýulmagy meýilleşdirilen yzygiderli gatnawlar mart aýyna, Jidda (Saud Arabystany) açyljak gatnawlar bolsa aprel aýyna çenli süýşürilýär.
Bütindünýä Saglygy Goraýyş Guramasy penşenbe güni geçirilen adatdan daşary ýygnagynyň netijesi boýunça koronawirusyň ýaýramagyny halkara ähmiýete eýe bolan adatdan daşary ýagdaý diýip yglan etdi.
Bu günki güne çenli Türkmenistanyň çäginde koronawirus bilen kesellemäniň ýeke ýagdaýy hem hasaba alynmady.