Volkswagen täze krossoweriniň premýerasyny anons etdi

Volkswagen kompaniýasy brendiň heniz at almadyk täze krossoweri görkezilen tizer wideoroligini çykardy. Awtomobiliň premýerasy üstümizdäki ýylyň 3-nji fewralynda Delidäki awtosalonda geçiriler.
Ilkinji nobatda, täze önüm ýerli bazara niýetleniler. Muňa garamazdan, krossoweriň beýleki dünýä ýurtlarynda hem satuwa çykmagy ahmal. Ulagy MQB A0 IN platformasynda gurarlar. Bu şassini Skoda-nyň Vision In atly täze ykjam krossoweri hem ulanýar. Bu ulagyň hem premýerasy Nýu-Delidäki motor-şounda geçiriler.
Täze krossower T-Crossy ýada salar. Ýöne awtomobil has agressiw dizaýna we beýik klirense eýe bolar. Has dogrusy, awtosalonda hem bu ulagyň konsepti görkeziler. Seriýaly krossower satlykda, takmynan, 2021-nji ýylda peýda bolar.
«IndianAutosBlog» saýtynyň maglumatlaryna görä, bu täze önümiň motor gammasyna hereketlendiriji alty basgançakly mehaniki guty ýa-da ýedi basgançakly «awtomat» bilen bilelikde işleýän 1,0 litrli enjam girer. Bu enjamyň kuwwatlylygy 115 at güýjüne barabar. 1,5 litrli atmosfera hereketlendirijisiniň hem peýda bolmagyna garaşylýar.
Öň, Volkswagen patent edarasynda täze krossowerleri üçin ulanjak T-Sport, T-Go we T-Coupe atlaryny patentledi. Şeýlelik bilen, Volkswageniň täze modelleri hem häzirki T-Cross we T-Roc krossowerleri ýaly şol bir stildäki ada eýe bolarlar.