«Ýewrowideniýe — 2020-niň» ýarym finallarynyň düzümi belli boldy

«Ýewrowideniýe» aýdym bäsleşiginiň bije çekilişigi tamamlandy. Russiýa we Belorus birinji ýarym finalyň birinji böleginde maý aýynyň 12-sine çykyş ederler. Bu ýurtlar bilen bir hatarda, sahna Awstraliýanyň, Demirgazyk Makedoniýanyň, Şwesiýanyň, Sloweniýanyň, Irlandiýanyň, Litwanyň wekilleri çykar. Ukrainadan, Norwegiýadan, Kiprden, Horwatiýadan, Azerbaýjandan, Maltadan, Ysraýyldan, Rumyniýadan we Belgiýadan gelen gatnaşyjylar özleriniň aýdymlary bilen birinji ýarym finalyň ikinji böleginde çykyş ederler. Mundan başga-da, Italiýanyň, Germaniýanyň we Niderlandiýanyň birinji ýarym finalda, Fransiýanyň, Ispaniýanyň we Beýik Britaniýanyň ikinjide ses berjekdigi belli boldy. Umumy alanyňda, bäsleşige 41 ýurt gatnaşar.
Her ýarym finaldan on gatnaşyjy maý aýynyň 16-syndaky finala geçerler. Bäsleşigiň deslapky finalistleri «Uly bäşligiň» – Beýik Britaniýanyň, Germaniýanyň, Fransiýanyň, Italiýanyň, Ispaniýanyň we Niderlandiýanyň wekilleri hasaplanylýar.
Bu ýylda «Ýewrowideniýe» Rotterdamdaky «Ahoy» konsert zalynda maý aýynyň 12-sinden 16-sy aralygy geçiriler. 65-nji ýubileý bäsleşigi «Open Up!» şygary astynda geçer. Bu barada bäsleşigiň resmi saýtynda habar berilýär.
Ýatladyp geçsek, geçen ýylyň maý aýynyň 18-ine Tel-Awiw şäherinde geçen «Ýewrowideniýe-2019-yň» finalynda Niderlandiýadan gatnaşyjy Dunkan Lourens «Arcade» kompozisiýasy bilen 492 bal gazanyp ýeňiji boldy. Ikinji orny 465 bal gazanan italiýaly Mahmood eýeledi, üçünji orna russiýaly Sergeý Lazarew 369 bal bilen mynasyp boldy. 2016-njy ýylda hem ol 491 bal gazanmak bilen bäsleşigiň bürünç baýragyny hem eýeläpdi.
«News.ru» internet-neşiriniň ýazmagyna görä, «Ýewrowideniýe-2020-niň» guramaçylary bäsleşigiň logotipini görkezdiler. Täze emblema gatnaşyjy-ýurtlaryň baýdaklarynyň reňkinden ybarat bolan bölek tegelek görnüşinde hödürlenildi.