Alymlar matematiki formula boýunça iň gowy kofeniň reseptini ýüze çykardylar

Amerikanyň Birleşen Ştatlarynyň matematikleri we himikleri kofeniň we gaýnak suwuň özara täsiriniň detallaryny öwrenmek bilen, iň gowy espressonyň taýýarlanyş reseptini ýüze çykardylar. Ylmy iş baradaky jikme-jik maglumatlar «Matter» ylmy neşiriniň sahypalarynda peýda boldy.
Espressonyň taýýarlanylyşy gaýnak suwuň üwelen kofe bilen birlikde süzgüçden geçirilmegini göz öňünde tutýar. Espressonyň reňki, hoşboý ysy we tagamy süzgüçdäki kofeniň möçberine, şeýle-de suwuň basyşy, temperaturasy we möçberi ýaly faktorlara-da bagly bolýar. Espressony söýüjiler şu faktorlaryň ujypsyzja üýtgeşmesi hem taýýar içginiň tagamyny düýpli üýtgedip bilýär diýip hasaplaýarlar.
Alymlaryň gelen iň esasy netijesi – ýokary hilli durnukly espressony taýýarlamak üçin kofe däneleriniň az mukdary gerek. «Eger-de ýigrimi däl-de, on bäş gram kofe alsaňyz we dänäni iri edip ownatsaňyz, onda siz çalt demlenilýän we ýokary hilli tagama eýe bolan içgini alarsyňyz» – diýip, alymlar belleýärler.
Şeýle netijäni çykarmak üçin, alymlar kofe maşynynyň kompýuter modelini işläp düzdüler, onda espressonyň taýýarlanylyşy alnyp barylýar. Model maşyn operatorynyň kontrollyk edip biljek faktorlaryny, şeýle-de taýýarlanyş prosesinde ýüze çykýan fiziki we himiki prosesleri nazara aldy. Iň esasy açyş – kofeniň durnuksyzlygynyň sebäbi onuň has ownuk görnüşde üwelmegidir. Has iri üwelme kofe bilen gyzgyn suwuň özara täsiriniň deň ölçegli bolmagyna ýardam berýär.