Türkmenistanyň Prezidenti Türkiýäniň Prezidentine gynanç bildirdi

Türkmenistanyň Prezidenti Gurbanguly Berdimuhamedow Türkiýäniň Prezidenti Rejep Taýyp Ärdogana ýurduň gündogarynda bolup geçen ýertitreme zerarly hem-de bu betbagtçylygyň netijesinde köp sanly raýatynyň pida bolmagy zerarly gynanç hatyny iberdi.
Türkmenistanyň Prezidenti şu agyr pursatda Türkmenistanyň halkynyň we Hökümetiniň adyndan, şeýle hem hut öz adyndan gurban bolanlaryň dogan-garyndaşlaryna hem-de ýakynlaryna ýürekden gynanjyny we medet beriji sözlerini beýan etdi.
Belläp geçsek, Türkiýäniň gündogarynda bolup geçen ýertitremede azyndan 22 adam aradan çykdy, 1000-den gowrak adam ejir çekdi. Rihteriň şkalasy boýunça 6,8 balla deň bolan ýertitremesi anna güni agşam Elýazyg welaýatynda hasaba alyndy. Bu ýerde 400 müňden gowrak adam ýaşaýar. Şeýle hem goňşy Malatýa hem ejir çekdi. Iki welaýatda onlarça binalar ýumruldy. Ýüzlerçe adamlar öýsüz galdylar. Ýertitremäniň täsirleri Türkiýäniň beýleki ýerlerinde, şeýle hem Ermenistanda, Gruziýada, Ysraýylda, Yrakda we Siriýada duýuldy.