Alymlar smartfonlaryň ýanynda ýatmagyň howpludygyny duýdurdylar

Kaliforniýanyň alymlary smartfony ýanyňda goýup ýatmagyň howpludygy barada aýtdylar. Şeýle «goňşuçylyk» kellagyrynyň döremegine, gulagyňda gohuň ýaňlanmagyna we ukusyzlyga getirip bilýär.
Smartfonuň köp eýeleri köplenç, gurluşy öz ýatýan ýeriniň ýanynda ýa-da kellesiniň gös-göni ýakynynda goýýarlar. Şeýle etmeklik organizm üçin howp salýar, çünki döwrebap telefonlar beýnä we adama zyýan ýetirýän radioýygylyklary goýberýärler. Esasan hem, olar organizmi ýaňy ösüp barýan ýetginjeklere has köp howp salýarlar. Şeýle ýagdaýda smartfony diňe bir ýatjak wagtyň daşda goýmaly däl-de, eýsem, gajetiň ulanylmagyny minimal derejä çenli çäklendirmeli. Uly we berkleşen organizm radioýygylykly şöhlelenmelere garşy durmaga ukyply bolýar, ýöne şonda-da telefony kelläň ýanynda köp saklamaklyk maslahat berilmeýär. Hatda telefonda gürleşen wagtyňyzda hem iň gowusy nauşnikden peýdalanmaly. Şeýle edilmese, adamda migren, gulagynda ses ýaňlanma we ukusyzlyk döräp başlaýar.
Ekspertler smartfonuň uzak wagtlap ulanylmagynyň rak keseliniň, önelgesizligiň we beýleki keselleriň ýüze çykmak howpuny ýokarlandyryp bilýändigini belleýärler. Gajetleriň şöhlesi ýada we eşidişe hem zyýan ýetirýär.
Alymlaryň smartfonlaryň rak kesellerini ýüze çykarmaga ukyplydygy barada edýän ätiýaçlyklaryna we nygtamalaryna garamazdan, heniz anyk baglanyşygy ýüze çykarmak başartmady. Ýöne şeýle ýagdaýda-da, lukmanlar smartfonlaryň ulanylmagyny mümkin bolan minimum derejä çenli çäklendirmek we olary iň bolmanda ýatmazyňdan iki sagat öň ulanmazlyk, gurluşy ýatýan ýeriňden mümkin boldugyndan daşda saklamak pikirleri bilen ylalaşýarlar.