Raýat awiasiýasynyň howpsuzlygyny üpjün etmek maksady bilen «Türkmenhowaýollary» agentliginiň Howpsuzlyk geňeşiniň nobatdaky mejlisinde Türkmenistanyň ähli howa gatnadyjylary üçin Eýranyň howa giňişliginden uçuşlary wagtlaýyn togtatmak hakynda karar kabul edildi. Bu barada ORIENT agentligi habar berýär.
Bu çözgüt üstaşyr awiagatnawlara hem, Eýranyň howa menzillerinde gonup geçýän uçuşlara hem degişlidir. Şunuň bilen baglylykda, «Türkmenistan» Awiakompaniýasy» açyk görnüşli paýdarlar jemgyýeti 10.01.2020 seneden Aşgabat – Abu-Dabi – Aşgabat, 13.01.2020 seneden bolsa Aşgabat – Dubaý – Aşgabat ugurlary boýunça gatnawlary wagtlaýyn togtadýar.
Şeýle hem «Turkmenistan Airlines» 2020-nji ýylyň 2-nji fewralyndan Jidda (Saud Arabystany Patyşalygy) we Malaýziýanyň paýtagty Kuala–Lumpura yzygiderli howa gatnawlaryny amala aşyryp başlaýar. Bu ugurlar boýunça ýolagçy gatnawlar Boeing – 777-200 LR kysymly uçarda amala aşyrylar.
«Türkmenhowaýollary» Eýranyň howa giňişligiden uçuşlary togtadýar we täze gatnawlary açýar
- 10.01.2020 17:11
- 10k+
