Türkmenistanyň Prezidenti Eýran Yslam Respublikasynyň Prezidentine gynanç bildirdi

Türkmenistanyň Prezidenti Gurbanguly Berdimuhamedow Eýran Yslam Respublikasynyň Prezidenti Hasan Ruhana Tähran şäheriniň Ymam Homeýni adyndaky halkara howa menziliniň golaýynda «Ukrainanyň halkara howa ýollary» awiakompaniýasynyň ýolagçy uçarynyň heläkçilige uçramagy hem-de bu betbagtçylygyň netijesinde Eýranyň köp sanly raýatynyň pida bolmagy zerarly gynanç hatyny iberdi.
Türkmenistanyň Prezidenti şu agyr pursatda Türkmenistanyň halkynyň we Hökümetiniň adyndan, şeýle hem hut öz adyndan gurban bolanlaryň dogan-garyndaşlaryna hem-de ýakynlaryna ýürekden gynanjyny we medet beriji sözlerini beýan etdi.
Deslapky maglumatlar boýunça çarşenbe güni irden Tähran şäherinde heläkçilige uçran Boeing 737-800 NG howa gämisinde Eýranyň 82 raýaty, Kanadanyň 63, Ukrainanyň 11 (şol sanda ekipaž), şeýle hem Şwesiýanyň, Owganystanyň we Beýik Britaniýanyň raýatlary bardy.
176 adamyň pida bolmagyna getiren awiaheläkçilik çarşenbe güni irden bolup geçdi. «Ukrainanyň halkara howaýollary» awiakompaniýasynyň ýolagçy uçary Tähran – Kiýew ugry boýunça gatnawy amala aşyrýardy. Ol Tährandan ýerli wagt bilen irden 6:10-da uçýar we birnäçe minutdan radarlardan ýitirim bolýar.