14-nji ýanwardan «Microsoft» Windows 7-niň üpjünçiligini bes edýär

«Microsoft» korporasiýasy 2020-nji ýylyň 14-nji ýanwaryndan başlap, Windows 7 operasion ulgamynyň üpjünçiligini bes eder, diýip kompaniýanyň saýtyna salgylanyp, habar beriş serişdeleri belleýär.
Net Applications guramasynyň maglumatlaryna görä, Windowsyň 7-nji wersiýasy stol üsti operasion ulgamlar bazarynda häzirki wagtda 47% eýeleýär. Bu diýildigi, Windows 7 meşhurlygy boýunça Windows 10, Windows 8/8.1, Windows XP we Windows Vista operasion ulgamlary goşup alanyňda hem bazaryň ýarysyny diýen ýaly eýeleýär diýmegi aňladýar.
Statistikadan görnüşi ýaly, «Microsoftyň» tutuş ýylyň dowamynda ulanyjylara mugt ýagdaýda Windows 10-a geçmegi teklip edendigine garamazdan, «ýediligi» ulanyjylaryň aglaba bölegi bu mümkinçilikden peýdalanmandyr.
Eger-de, 15-nji ýanwardan ulanyjylaryň aglabasy heniz hem Windows 7-de galsa, onda olaryň operasion ulgamy üçin hiç hili obnowleniýalar, şol sanda howpsuzlyk bilen bagly täzelenişler çykarylmaz. Bu bolsa Windows 7-ni «Microsoftyň» 2014-nji ýylyň aprelinde üpjünçiligini bes eden «Windows XP» ýa-da ondan öňki «Windows Vista» ýaly zyýanly programmalardan goranmakda gowşak edip, hakerler üçin ýeňil mümkinçilik edip goýar.
Belläp geçsek, Windows 7 ulgamy 2009-njy ýylyň oktýabrynda çykaryldy. «Microsoft» kompaniýasy 10 ýylyň dowamynda bu wersiýany üpjün etmek boýunça borçnamany öz üstüne aldy.
Geçen ýylyň dekabrynda mälim bolşy ýaly, «Microsoft» Windows 10 Mobile operasion ulgamynyň soňky wersiýasynyň üpjünçiligini resmi taýdan bes eder.