Haýsy miweleri şänigi bilen iýmek bolýar?

Tebigatda şänigi kellagyrydan halas ediji we howply keselleriň güýçlenmeginiň öňüni alyjy köp peýdaly maddalary özünde saklaýan miweler hem ösýär. Geliň, şu ýerde haýsy miweleriň şänigini çeýnäp ýuwdup bolýandygyny, haýsylarynyň bolsa zyýan getirip biljekdigini belläp geçeliň.
Haýsy miweleriň şänigini asla ýuwutmaly däl?
Ilkinji nobatda üljäni ýada salmaly, onuň şänigi diňe bir ajy bolman, eýsem, özünde amigdalin atly maddany hem saklaýar. Ol aşgazanyň kislota gurşawyna düşen badyna, iki sany başga madda bölünýär – glýukoza we sian turşusy. Soňkusy güýçli zäherlenmäniň sebäbi bolup bilýär. Tejribeleriň aýtmagyna görä, şol sebäp bilen hem adamlara almanyň, armydyň, garalynyň we çerýomuhanyň şänigini ýuwutmak bolmaýar.
Saglyk üçin haýsy miweleriň şänigi peýdaly?
Nary şänigi bilen arkaýyn iýmek bolýar, ýöne ony gowy çeýnemeli. Şeýle usul bilen nary iýmek arkaly adamlar diňe bir köp peýdaly maddalary kabul etmän, eýsem, täsin ösümligiň miwesiniň has hem baý tagamyny duýup bilerler. Narda peýdaly komponentler diýseň köp, olaryň arasyndan A, B we E witaminleri bellemek bolar. Dietologlar naryň şänikleriniň aşgazany berkidýändigine we iýmit siňdiriş organlarynyň ýagdaýyna oňaýly täsir edýändigine ynandyrýarlar.
Şeýle-de, adamlar islän wagtlary limon, apelsin we mandarin ýaly sitruslaryň hem şänigini arkaýyn iýip bilýärler. Limon şäniklerini kellagyry wagtynda çeýnemek bolar.
Barlagçylaryň pikiri boýunça, apelsiniň we mandariniň şänikleri garabaş keselleri bilen göreşde örän peýdaly. Esasy zat peýdaly maddalaryň ýogyn we berk gabykdan çykyp bilmegi üçin, şänikleri suw bilen içmän, hökmany suratda gowy çeýnemelidigini ýatda saklamaly.
Garpyzyň şänikleri rak keseliniň güýçlenmegine ýol bermeýär hem-de ýüregiň işleýşini gowulandyrýar. Kädiniň çigitleri madda çalşygyny kadalaşdyrýar we iýmit-siňdiriş organlarynyň keselleri bilen göreşmekde kömek edýär.