Howa gatnawlarynyň howpsuzlyk derejesini ýokarlandyrmak, Raýat awiasiýasynyň halkara guramasynyň (IKAO) howpsuzlyk kriteriýalaryny we maslahatlaryny ornaşdyrmak maksady bilen, Aşgabadyň Halkara howa menzili awariýa-halas ediş türgenleşiklerini geçirdi. Bu barada ORIENT habar berýär.
Aşgabat – Daşoguz ýolunyň böleginde geçirilen türgenleşiklere awariýa-halas ediş toparlary, aeroportyň gulluklarynyň we bölümleriniň başlyklary, uçarmanlar, uçarbeletler, serhet we gümrük gulluklarynyň brigadalary gatnaşdylar. «Türkmenistan» awiakompaniýasynyň Mi-8 dikuçary, şäher tiz kömek gulluklarynyň brigadasy we beýleki tehnikalar herekete getirildi.
Bellenilen meýilnama laýyklykda, ýagny uçar howa galyp başlanynda onuň hereketlendirijisine guş sürüsiniň düşmegi bilen mejbury gonmakda — türgenleşige gatnaşjylar ýolagçylary, ekipažyň agzalaryny, ýükleri we awiasion tehnikalary halas etmekde operatiwlik görkezdiler. Olar «ejir çekenlere» ilkinji lukmançylyk kömegini berdiler, wakanyň «bolan ýerinden» adamlary halas etdiler.
Türgenleşige gatnaşanlaryň ählisi adatdan daşary we awariýa ýagdaýlarynda tiz herekete gelmekde oňat taýýarlyk görkezdiler. Türkmen raýat awiasiýasynyň howpsuzlyk gulluklary bolsa halkara ülňülerine laýyklygyny subut etdiler.
Aşgabadyň Halkara howa menzili awariýa-halas ediş türgenleşiklerini geçirdi
- 22.12.2019 22:10
- 8.3k+
![Aşgabadyň Halkara howa menzili awariýa-halas ediş türgenleşiklerini geçirdi](https://tmcars.info/tmcars/images/original/2019/12/22/22/11/6a3637a3-1a3a-423a-98f1-cdeafddd1c8c.jpg)