Türkmenistan ynsanperwer kömek hökmünde Owganystan Yslam Respublikasyna ýurduň ykdysady hajatlary üçin kuwwatly elektroenergetika enjamlaryny gowşurdy. Şu mynasybetli goňşy ýurduň Hyrat welaýatynyň Turgundy şäherçesinde dabara geçirildi.
Mälim bolşy ýaly, Türkmenistanyň Prezidenti şu ýylyň noýabrynda owgan tarapyna güýjenmesi 220/110/10 kW, kuwwatlylygy 125 MWt bolan transformatory degişli enjamlary bilen bilelikde ynsanperwer kömek hökmünde bermek hakynda Buýruga gol çekdi. Bu goňşy ýurtda ygtybarly energiýa üpjünçiligini ýola goýmakda, şeýle hem ýurdumyzyň ugradýan elektrik energiýasynyň möçberini artdyrmakda möhüm ähmiýete eýe bolar.
Gurbanguly Berdimuhamedowyň başlangyjy bilen Türkmenistan Owganystanyň durmuş-ykdysady taýdan ösmegine, bu ýerde durnuklylygyň we howpsuzlygyň üpjün edilmegine hemmetaraplaýyn goldaw berýär.
Elektrik energiýasynyň ýeňillikli bahadan berilmegi, türkmen gurluşykçylarynyň güýji bilen durmuş maksatly desgalaryň, şol sanda lukmançylyk hem-de bilim edaralarynyň gurulmagy, Ahal welaýatynda gurlan zawodda tebigy gazdan öndürilen ekologiýa taýdan arassa benziniň ilkinji tapgyrynyň ugradylmagy Bitarap ýurdumyzyň hoşniýetli goňşuçylyk we ynsanperwer döwlet syýasatynyň aýdyň subutnamasy bolup durýar.
Bulardan başga-da, Türkmenistan Owganystanyň ýakyn goňşusy hökmünde owgan ykdysadyýetiniň energetika, ulag-aragatnaşyk we senagat sütünlerini berkitmäge gönükdirilen giň gerimli ykdysady taslamalaryň amala aşyrylmagyna işjeň gatnaşýar.
Türkmenistan ynsanperwer kömek hökmünde Owganystana elektroenergetika enjamlaryny gowşurdy
- 18.12.2019 06:13
- 3.2k+
