«Maşa we Aýy» dünýäde iň isleg bildirilýän multfilmleriň bäşligine girdi

Rus multfilmi «Maşa we Aýy» ýylsaýyn dünýäniň ähli ýerindäki tomaşaçylaryň arasynda uly meşhurlyk gazanýar. Parrot Analytics halkara barlag agentliginiň habar bermegine görä, Animaccord-yň önümi bolan rus multserialy «Maşa we Aýy» çagalar tarapyndan iň bir isleg bildirilýän multfilmleriň bäşligine girdi.
Barlaga iki ýaşdan on bir ýaşa çenli körpelere niýetlenilen ýigrimi müň güýmenje gepleşikleri gatnaşdy. Bu programmalara bildirilýän islegleriň derejesi onlaýn-gözleg, onlaýn-tomaşa we olaryň sosial torlardaky interaksiýasy arkaly ölçenildi. Bu barlagyň netijesi boýunça «Maşa we Aýy» bäşlige girdi we nobatdaky rekordy täzeledi, onuň epizodlarynyň birine YouTube-da 4 mlrd gezekden hem köp seredilipdir.
Belläp geçsek, garagol Maşa we onuň mähirli dosty Aýy baradaky komediýa multserialynyň görkezilmegine 2009-njy ýylyň 7-nji noýabrynda başlanylypdy. Häzirki wagtda multfilm 36 dile geçirilen we dünýäniň ýüzden gowrak döwletinde goýberilýär.
Multserialyň döredilmeginde 70-den gowrak adam zähmet çekýär. Mundan başga-da, bu serial öň iň köp tomaşa edilýänligi bilen Ginnesiň rekordlar Kitabyna girizilipdi.