Özbegistan Respublikasynyň Ylymlar akademiýasynyň prezidiumynyň agzalarynyň çözgüdi bilen Türkmenistanyň Prezidenti Gurbanguly Berdimuhamedowa «Hormatly akademik» diýen dereje berildi.
Bu waka dostlukly ýurduň Baştutanynyň ylmyň dürli ugurlarynyň ösdürilmegi, doganlyk özbek hem-de türkmen halklarynyň arasyndaky dostluk we özara düşünişmek gatnaşyklarynyň pugtalandyrylmagy ugrunda edýän ýadawsyz tagallasyna goýulýan hormatyň hem-de onuň ykrarnamasynyň aýdyň nyşanydyr diýip, Prezident Şawkat Mirziýoýew belent mertebeli myhmany bu hormatly at bilen gutlady hem-de iň gowy arzuwlaryny beýan etdi.
Dabara gatnaşyjylaryň şowhunly el çarpyşmalary bilen Özbegistanyň Ylymlar akademiýasynyň prezidenti Behzot Ýuldaşew Prezident Gurbanguly Berdimuhamedowa hormatly akademigiň lybasyny geýdirdi, hormat nyşanyny we degişli diplomy gowşurdy.
Prezident Gurbanguly Berdimuhamedow özüne Özbegistan Respublikasynyň Ylymlar akademiýasynyň «Hormatly akademigi» diýen derejäniň berlendigi üçin minnetdarlyk bildirdi hem-de ony Türkmenistana goýulýan hormatyň, ýurdumyzyň ylym we bilim babatda ýeten derejesiniň ykrar edilmegi we iki ýurduň halklarynyň dostluk hem-de pugta hyzmatdaşlyk gatnaşyklarynyň berkeýändiginiň nyşany hökmünde kabul edýändigini nygtady.
Türkmenistanyň Prezidentine Özbegistanyň Ylymlar akademiýasynyň «Hormatly akademigi» diýen dereje berildi
- 29.11.2019 16:43
- 4.9k+