Türkmenistanda IT hyzmatlary boýunça Maglumat tehnologiýalar merkezi dörediler

Ýurdumyzda elektron hyzmatlarynyň sanawyny artdyrmak, Interneti ösdürmek üçin Senagat we kommunikasiýa ministrliginiň «Türkmenaragatnaşyk» agentliginiň binýadynda Maglumat tehnologiýalar merkezini döretmek meýilleşdirilýär. Şeýle-de bu merkeziň guramaçylyk-usulyýet işini ýola goýmak maksady bilen, pudagara toparyny döretmek teklip edilýär. Bu babatda wise-premýer B.Öwezow hökümet mejlisinde belläp geçdi.
Hökümetiň Başlygynyň orunbasary hasabatynyň çäklerinde «Türkmenaragatnaşyk» agentliginiň Telekommunikasiýalar we informatika instituty bilen bilelikde IT meýdançasyny döretmek boýunça taslamanyň işlenip taýýarlanylandygyny habar berdi.
Habar berlişi ýaly, şu taslama laýyklykda bu ýokary okuw mekdebiniň binýadynda hojalyk hasaplaşygynda işleýän maglumat tehnologiýalar meýdançasyny açmak meýilleşdirilýär. Şol ýerde hünärmenler we talyplar hünär derejesini ýokarlandyrmak bilen çäklenmän, eýsem, tejribe alyşmaga hem-de programma üpjünçiligi babatda bilim almaga mümkinçilik dörediler.
Häzir ýaşlaryň döwrebap bilim almagy hem-de ýokary hünärli hünärmenleri taýýarlamak üçin ähli şertler döredildi. Degişli konsepsiýa laýyklykda, ýokary okuw mekdeplerinde professor-mugallymlar düzüminiň, şeýle hem talyplaryň tagallalary bilen sanly bilimiň ulgamlaýyn üpjünçilik maksatnamasy, degişli portallar işlenip taýýarlanyldy diýip, Gurbanguly Berdimuhamedow belledi. Sanly tehnologiýalaryň giňden ornaşdyrylmagy netijesinde ýokary okuw mekdeplerinde daşary ýurtly hyzmatdaşlaryň gatnaşmagynda uzak aralykdan okuwlar we wideokonferensiýalar yzygiderli guralýar.
Türkmen Lideriniň belleýşi ýaly, sanly bilim ulgamynyň ösdürilmegi bu ugurda milli we halkara ölçeglerine, häzirki döwrüň talaplaryna kybap gelýän ýokary hilli hyzmatlary almak üçin ähli mümkinçilikleri üpjün etmelidir diýip, milli Liderimiz wise-premýere IT-meýdançalary döretmek baradaky meseleleri gutarnykly seljermegi tabşyrdy.