Türkmenistan Bütindünýä suw geňeşiniň agzalygyna kabul edildi

Müsür Arap Respublikasynyň Kair şäherinde Bütindünýä suw geňeşiniň Dolandyryjylar geňeşiniň nobatdaky mejlisinde geçirilen geňeşiň çözgüdi esasynda Türkmenistanyň Suw hojalygy baradaky döwlet komiteti Bütindünýä suw geňeşiniň agzalygyna kabul edildi. Bu barada Trend agentligi Türkmenistanyň daşary syýasat edarasyna salgylanyp habar berýär.
Bütindünýä suw geňeşi — hünärmenleri we halkara hökümet we hökümet däl guramalaryny birleşdirýän köptaraplaýyn halkara, söwda däl meýdançadyr. 1996-njy ýylda döredilen geňeş dünýäniň 50 ýurdundan 300-den gowrak guramany özünde jemleýär. Onuň merkezi edarasy Marselde (Fransiýada) ýerleşýär.
Belläp geçsek, Merkezi Aziýa sebitinde oba hojalygynda we senagatda, elektrik energiýasynyň önümçiliginde, ilaty agyz suwy bilen üpjün etmekde esasy suw çeşmesi hökmünde derýalar hyzmat edýär. Olaryň ählisi diýen ýaly bolsa – serhetara ýerleşendirler.
Türkmenistan Gazagystan, Özbegistan, Eýran we Owganystan bilen serhetleşýär hem-de dört sany serhetara derýalardan — Amyderýadan, Tejenden, Etrekden we Murgapdan ylalaşylan kwotalara laýyklykda gelýän suw serişdelerinden peýdalanýar.