Türkmenistanyň Prezidentine Hirosaki uniwersitetiniň Hormatly doktory diýen at dakyldy

22-nji oktýabrda «Chinzanso Tokyo» myhmanhanasynda Prezident Gurbanguly Berdimuhamedowa Hirosaki uniwersitetiniň Hormatly doktory diýen ady dakmak dabarasy boldy.
«Ballroom» zalynda Türkmen Liderini Hirosaki uniwersitetiniň ýolbaşçysy Kei Sato garşylady. Bu ýere şu uniwersitetiň we Ýaponiýanyň beýleki ýokary okuw mekdepleriniň professor-mugallymlar düzümi hem-de talyplary, Ylym we tehnologik hyzmatdaşlyk boýunça ýapon-türkmen assosiasiýasynyň wekilleri, iki ýurduň resmi wekiliýetleriniň agzalary ýygnandylar.
1949-njy ýylda esaslandyrylan Hirosaki uniwersiteti dünýäde abraýly okuw mekdepleriniň biri hasaplanylýar.
Bu ýerde 7 müňden gowrak talyp bilim alýar. Mugallymlar düzümi 2 müňden gowrak hünärmenden ybaratdyr. Uniwersitetiň esasy wezipesi geljekki nesliň isleglerini kanagatlandyrmak üçin çeýe bilim we ylmy-barlag işini alyp barmakdan, talyplara özleriniň şahsy ukyplaryny ösdürmäge hem-de hünär bilimini almaga mümkinçilik berýän gurşawy döretmekden ybaratdyr.
Ýokary okuw mekdebiniň düzüminde ynsanperwer we durmuş ylymlary, bilim, ylym we tehnologiýalar, oba hojalygy we tebigy ylymlar fakultetleri, lukmançylyk mekdebi hem-de saglyk baradaky ylym mekdebi bar.
Dabaranyň barşynda ýokary okuw mekdebiniň Alymlar geňeşiniň döwlet Baştutany Gurbanguly Berdimuhamedowa türkmen-ýapon gatnaşyklaryny ösdürmäge şahsy goşandy hem-de ylmy we bilimi ösdürmek üçin alyp barýan işi üçin Hirosaki uniwersitetiniň Hormatly doktory adyny dakmak hakyndaky çözgüdi yglan edilýär.
Uniwersitetiň ýolbaşçysy ýygnananlaryň şowhunly elçarpyşmalary astynda dabaraly ýagdaýda hormatly Prezidentimize degişli diplomy gowşurdy.