Apple-yň täze iOS ulgamynda türkmen klawiaturasy peýda boldy

«Apple» amerikan kompaniýasy iOS operasion ulgamynyň täze 13-nji wersiýasyny köpçülige ýetirdi. Bu wersiýada türkmen klawiaturasy peýda boldy. Bu barada Turkmenportal habar berýär.
iOS — «Apple» kompaniýasy tarapyndan işlenip düzülýän we öndürilýän smartfonlar, elektron planşetler, mobil enjamlar üçin niýetlenilen mobil operasion ulgamydyr.
iOS 13-de klawiatura üçin 38 sany täze dil peýda boldy, olaryň içinde türkmen, gazak, gyrgyz, mongol, täjik, kürt, uýgur we özbek dilleri hem bar. Dilleriň doly sanawyny Apple-yň saýtyndan görüp bilersiňiz. iOS-yň täze wersiýasy resmi taýdan tanyşdyrylandan soňra 19-njy sentýabrda elýeterli boldy. Operasion ulgam tutuşlygyna türkmen diline geçirilmedik, häzirlikçe diňe türkmen dilindäki klawiatura goşuldy.
Türkmen dilindäki klawiaturadan peýdalanmak üçin «Apple» enjamyňyzy operasion ulgamyny soňky wersiýa çenli täzelemeli. Munuň üçin, «Настройках» → «Основные» → «Обновление ПО» → «Загрузить и установить». Täzeläniňizden soňra Iphone enjamyňyza türkmen dilini ýüklemek üçin «Настройки» → «Клавиатура» → «Клавиатуры» yzygiderligini saklaň. «Новые клавиатуры» bölüminden «türkmen dilini» saýlaň.
Apple kompaniýasynyň şu enjamlary iOS 13 operasion ulgamy kabul edip bilýär: iPhone 6S, iPhone 6S Plus, iPhone SE, iPhone 7, iPhone 7 Plus, iPhone 8, iPhone 8 Plus, iPhone X, iPhone XR, iPhone XS, iPhone XS Max, iPhone 11, iPhone 11 Pro, iPhone 11 Pro Max, iPod touch 7.
Täze wersiýadan öň Apple ulanyjylary «App Store-den» türkmen klawiaturany ýükläp almaly bolýardylar. Türkmen klawiaturadan peýdalananyňyzda iPhone-da awtodüzediş işlemeýär we prediktiw giriziş ýok. Ýagny klawiatura siziň ýalňyşlyklaryňyzy düzetmez we sözleriň wariantlaryny çykarmaz.
Mundan başga-da, operasion ulgamyň täze wersiýasynda garaňkylyk režimi peýda boldy. Ol Apple-yň ähli standart programmalaryny gara-çal reňke geçirýär.