Türkmen-singapur gepleşikleriniň netijeleri boýunça 12 sany resminama gol çekildi

Türkmenistanyň Prezidentiniň Singapur Respublikasyna saparynyň çäklerinde ikitaraplaýyn resminamalara gol çekildi. Şol resminamalar şulardan yabarat:
Diplomatik, gulluk ýa-da resmi pasportlaryň eýeleri üçin wiza talaplaryny özara ýatyrmak hakynda Türkmenistanyň Hökümeti bilen Singapur Respublikasynyň Hökümetiniň arasynda Ylalaşyga; Girdejiler üçin salgytlar babatda iki gezek salgyt salynmagyny aradan aýyrmak we salgytlary tölemekden boýun gaçyrylmagynyň öňüni almak hakynda Türkmenistanyň Hökümeti bilen Singapur Respublikasynyň Hökümetiniň arasynda Ylalaşyga; Hukuk ulgamynda hyzmatdaşlyk etmek hakynda Türkmenistanyň Adalat ministrligi bilen Singapur Respublikasynyň Ýustisiýa ministrliginiň arasynda Özara düşünişmek hakyndaky Ähtnama gol çekildi.
Umuman, Türkmenistanyň Prezidenti saparyň dowamynda iki ýurduň hökümetleri tarapyndan geçirilen hem-de türkmen-singapur gatnaşyklaryny hil taýdan täze derejä we ösüşe gönükdiren bilelikdäki işe ýokary baha berdi. Ikitaraplaýyn resminamalaryň 12-sine gol çekilmegi hem muňa şaýatlyk edýär. Has wajyp ulgamlarda hyzmatdaşlygy işjeňleşdirmek, umumy bähbitleri ilerletmek üçin şertleri döretmek nukdaýnazaryndan bu resminamalar örän wajypdyr.