Aziýanyň Futbol Konfederasiýasy (AFK) Aşgabadyň köpugurly «Olimpiýa» stadionyny AFK-nyň Çempionlar ligasy-2-niň 1/8 finalynyň birinji duşuşygy üçin «Arkadag» toparynyň öý meýdançasy hökmünde resmi taýdan tassyklady. Türkmenistanyň çempiony bu tapgyrda Saud Arabystanynyň «Al-Nasr» kluby bilen duşuşar.
Paýtagtymyzyň Olimpiýa stadiony 45 müň tomaşaça niýetlenen bolup, ol Merkezi Aziýanyň iň uly sport desgalarynyň biri hasaplanýar. Bu arena 2017-nji ýylda geçirilen Ýapyk binalarda we söweş sungaty boýunça V Aziýa oýunlary üçin döwrebaplaşdyrylypdy. Stadionyň şol wagtdan bäri ilkinji gezek resmi futbol duşuşygyny kabul etjekdigini bellemek gerek.
Mundan ozal «Arkadag» topary özüniň öý duşuşyklaryny Arkadag şäherindäki 10 müň orunlyk stadionlarda geçirýärdi.
Şeýle hem AFK Eýranyň klublarynyň gatnaşmagyndaky duşuşyklary neýtral meýdançalara geçirmek barada karar kabul etdi. «Sepahan» we «Esteglal» klublarynyň oýunlarynyň geçiriljek takyk ýerleri soňra yglan ediler.
AFK-nyň Çempionlar ligasy-2: 1/8 final jübütleri
Günbatar zolagy:
- «Arkadag» (Türkmenistan) — «Al-Nasr» (Saud Arabystany)
- «Al-Zawra» (Yrak) — «Al-Wasl» (BAE)
- «Sepahan» (Eýran) — «Al-Ahli» (Katar)
- «Esteglal» (Eýran) — «Al-Husseýn» (Iordaniýa)
Gündogar zolagy:
- «Pohang Stilers» (Koreýa Respublikasy) — «Gamba Osaka» (Ýaponiýa)
- «Ratçaburi» (Tailand) — «Persib Bandung» (Indoneziýa)
- «Bangkok Ýunaýted» (Tailand) — «Makartur» (Awstraliýa)
- «Kong An Hanoý» (Wýetnam) — «Tampines Rowers» (Singapur)
Ýaryşyň düzgünnamasyna görä, pleý-off tapgyryna çykan klublar uly möçberde baýrak pullaryna eýe bolýarlar:
- Çärýek finala çykmak: 160 müň dollar;
- Ýarym finala çykmak: 240 müň dollar;
- Finalçy: 1 million dollar;
- Ýeňiji: 2,5 million dollar.
