Türkmenistan we Eýran yzygiderli gämi gatnawyny ýola goýar

Tähran we Aşgabat göni deňiz gatnawyny ýola goýmak boýunça ylalaşyk gazandy, diýip Eýranyň ulag we şäher ösüş ministri Mohammad Eslaminiň sözlerine salgylanyp ISNA agentligi habar berýär.
Ministriň bellemegine görä, şu we beýleki meseleler boýunça ylalaşyga oktýabr aýynda Aşgabatda geçiriljek Sammitde resmi ýagdaýda gol çekiler.
Şu aýyň başynda Eslami Türkmenistana sapar bilen geldi we birinji Hazar ykdysady forumynyň çäklerinde hazarýaka döwletleriniň «bäşliginiň» ulag ministrleriniň duşuşygyna gatnaşdy.
Saparyň barşynda ugurdaş edaralar bilen ulag we söwda ulgamlarynda gatnaşyklary giňeltmek boýunça ikitaraplaýyn gepleşikler geçirildi. Taraplar şeýle hem wiza almaklygy ýeňilleşdirmek, suw hojalyk we deňiz gurşawyny goramak meselelerini maslahatlaşdylar.
Eslaminiň aýtmagyna görä, deňiz kommunikasiýalarynyň ösdürilmegi, Türkmenistanyň we Eýranyň portlarynyň arasynda gämi gatnawynyň ýola goýulmagy, «Demirgazyk-Günorta» ulag geçelgesiniň hereket etmegi we bu ugurlarda bökdençlikleriň aradan aýrylmagy duşuşyklarda ara alnyp maslahatlaşylan esasy meseleler boldy.