«Mongol-ralli 2019-a» gatnaşyjylar Aşgabada geldiler

Mongol rallisi awtomobil marafony her tomusda geçirilýän özüne çekiji başdangeçirmelere baý bolan ýaryşdyr. Bu ýaryşlar marafona ýörite berkidilen tehniki gulluklaryň hem-de anyk kesgitlenen ugruň bolmazlygy bilen tapawutlanýar. Oňa gatnaşyjylarda bary-ýogy hereketlendirijisiniň göwrümi 1 litre barabar bolan kiçiräjik maşyn we ynamdar ýoldaşlary bolýar, diýip ORIENT agentligi habar berýär.
Bu ulag bilen olar Mongoliýa çenli Ýewropanyň we Aziýanyň köp sanly döwletleriniň içinden geçýärler. Ýaryşyň tamamlanýan nokady Russiýa Federasiýasyndaky Ulan-Ude şäheridir. Ýaryşyň maksady pellehana gelmekdir. Burýatiýanyň paýtagtyna dürli ugurlar boýunça baryp bolýar.
Şu ýyl rallä 700 adam gatnaşýar, şolardan 650-si erkekler we 50 zenan bar.
Britaniýaly Jami, Jeýms, Jek we Piter Türkmenistana Eýranyň üsti bilen geldiler. Londandan badalga alan topar Ýewropanyň we Kawkazyň ýurtlarynyň üsti bilen Eýrana ýetdiler, soňam bu gün Aşgabada geldiler. Şähere doly aýlanyp ýetişmeseler-de rallä gatnaşyjylar ýurdumyzda gören zatlaryna ýokary baha berdiler — ýollarda ulag dykynlarynyň bolmazlygy, binalaryň özboluşly bezeg aýratynlygy olaryň ýokary bahasyna mynasyp boldy.
Syýahatyň umumy dowamlylygy 70 gün, başgaça aýdylanda, iki aýdan çala geçýär. Ýoluň uzynlygy on müňlerçe kilometrden hem köp. Gatnaşyjylar Derwezädäki gaz kraterini, soňra bolsa «Awaza» milli syýahatçylyk zolagyna baryp görmegi meýilleşdirýärler.
Mongol rallisine gatnaşýan ýene-de bir topar zenanlardan ybarat bolup, olar Türkmenistana Azerbaýanyň üsti bilen geldiler. 46 günüň dowamynda batyrgaý zenanlar Ysraýyl döwletinden badalga alyp, 19 döwlete baryp gördüler. Raçel Awruh, Adina Korn, Alisiýa Şnaýder ralli tamamlanandan soňra Hytaýa syýahat etmegi maksat edinýärler.
Birnäçe günden rallä gatnaşyjylar Özbegistana, Gyrgyzystana, Gazagystana, Russiýa bararlar we şol ýerde hem pellehana ýeterler. Ýaryşyň tamamlanmagyna az wagt — birnäçe ýurt we bir aý möhlet galdy.