Hazar ykdysady forumyna dünýäniň öňdebaryjy maliýe guramalarynyň wekilleri gatnaşar

Bütindünýä bankynyň, Halkara pul gaznasynyň, Ýewropanyň abatlaýyş we ösüş bankynyň, Aziýa ösüş bankynyň, Yslam ösüş bankynyň we Halkara maliýe korporasiýasynyň we beýleki iri maliýe-karz guramalarynyň wekilleri 12-nji awgustda geçiriljek birinji Hazar ykdysady forumyna gatnaşmaga isleg bildirdiler. Bu barada Centralasia.news Türkmenistanyň Merkezi bankynyň jemgyýetçilik gatnaşyklary we protokol bölüminiň baş hünärmeni Maksat Akyýewe salgylanyp habar berýär.
Merkezi bankyň wekiliniň aýtmagyna görä, Awaza geçiriljek foruma şeýle hem Doýçe bankyň (Germaniýa), Kommersbankyň (Germaniýa), De La Rue britan kompaniýasynyň, Kredi Agrikol (Fransiýa), Credit Suisse (Şweýsariýa) banklarynyň, Hytaý ösüş bankynyň, Ýewraziýa bankynyň (Gazagystan) we beýleki köpsanly halkara we milli banklardyr kompaniýalaryň wekilleri gatnaşar.
Sanalyp geçilen maliýe-kredit guramalarynyň ählisi diýen ýaly Türkmenistanyň öňden gelýän hyzmatdaşlary. Bu guramalaryň wekilleriniň Hazar ykdysady forumyna gatnaşmagy bu çäräniň ýokary derejesine şaýatlyk edýär. Belläp geçsek, Birinji Hazar ykdysady forumy Türkmenistanyň başlangyjy bilen ilkinji gezek geçirilýär. Oňa gatnaşyjylar söwda, ulag, senagat, energetika, syýahatçylyk we ylym ulgamlarynda hyzmatdaşlygy ösdürmegiň meselelerini maslahatlaşar. Forumyň dowamynda özüne çekiji ykdysady taslamalaryň öňe sürülmegine garaşylýar. Hut şu taslamalary ýerine ýetirmek üçin hem maliýe guramalarynyň hyzmaty zerurdyr.
«Голос СНГ» onlaýn radiosynyň habar bermegine görä, Awazada geçiriljek foruma iki müňden gowrak adam, şol sanda 36 döwletden 700-den gowrak wekil, 40 sany halkara guramalarynyň wekilleri, 60 sany halkara habarlar agentlikleriniň wekilleri, şeýle hem dürli ýurtlardan 530-dan gowrak kompaniýalaryň wekilleri gatnaşar.