Türkmen telekeçileri I Hazar ykdysady forumyna gatnaşmaga taýýarlyk görýär

Türkmenistanyň Senagatçylar we telekeçiler birleşmesinde şu ýylyň 11-12-nji awgustynda «Awaza» milli syýahatçylyk zolagynda geçiriljek birinji Hazar ykdysady forumynyň çäklerinde geçiriljek çärelere gatnaşamaga işjeň taýýarlyk görülýär. Bu barada Turkmenportal TSTB-niň resmi saýtyna salgylanyp habar berýär.
Forumyň çäklerinde geçiriljek möhüm ähmiýetli çäreleriň hatarynda «Hazar innowasion tehnologiýalar» sergisi we «Türkmen sähra — 2019» awtomobil sergisi bar.
Bellenilişi ýaly, Türkmenistanyň Senagatçylar we telekeçiler birleşmesi innowasion sergä we işewür toparlaryň duşuşygyna gatnaşmak üçin ýüzden gowrak agzalaryny ugradýar. Olaryň hatarynda ulag-logistika ulgamynda, agrosenagat toplumynda, senagatyň beýleki pudaklarynda, IT-tehnologiýalaryny ornaşdyrmakda ýöriteleşen iri kärhanalary we kompaniýalar bar. mundan başga-da, TSTB-niň çakylygy bilen Hazar ykdysady forumynyň çärelerine dünýäniň dürli künjeginden elliden gowrak daşary ýurt kompaniýalary dürli ugurlar boýunça gatnaşar.
Hazar sebitiniň we gyzyklanma bildirýän beýleki döwletleriň işewür toparlarynyň duşuşyklarynyň maksatnamasy söwda-ykdysady gatnaşyklary işjeňleşdirmek, senagat, energetika, syýahatçylyk we özara gyzyklanma döreýän beýleki ugurlarda maýa goýum işjeňligini artdyrmak meseleleri boýunça mowzuklaýyn sessiýalary geçirmekligi göz öňünde tutýar.
Şeýle hem TSTB-niň agzalary bilen daşary ýurt döwletleriň işewür toparlarynyň arasynda ikitaraplaýyn ylalaşyklara gol çekilmegine garaşylýar.