Ýaş türkmen žurnalistleri sebit bäsleşigine gatnaşmaga çagyrylýar

«Bosfor» ýaşlar merkezi Merkezi Aziýa döwletleri üçin «Media CAMP Award» atly ilkinji žurnalistik bäsleşigine gatnaşmak üçin arzalary kabul edýändigini yglan edýär. Bu barada Orient agentligi habar berýär.
Sebitde media ulgamyň ösmegine gönükdirilen bäsleşigiň esasy maksady jemgyýetçilik ähmiýetli wakalary şöhlelendirýän zehinli žurnalistleri höweslendirmekden ybaratdyr. 
Döredijilik bäsleşigine žurnalistler, döredijilik toparlary, şeýle hem sebitiň hasaba alnan mediakompaniýalarynda işleýän habarçylar we ştatdan daşary habarçylar gatnaşyp biler. Olar habar beriş serişdelerinde 2018-nji ýylyň 1-nji awgustyndan 31-nji oýuny aralygynda döwlet ýa-da rus dilinde neşir edilen işlerini hödürlemeli.
Bäsleşik üçin materiallar «Häkimiýet we jemgyýet», «Serhetsiz nesil — Mümkinçilikleriň eýýamy», «Kömek etmäge wagt geldi», «Gahrymanlar golaýymyzda» we «Obýektiw» atly ýörite ugurlar boýunça onlaýn, çap edilen, radio ýa-da TW görnüşde kabul edilýär. «Obýektiw» ugry boýunça fotosuratlar kabul ediler we onuň ýeňijisi internet-ses bermek arkaly kesgitleniler.
Bäsleşige gatnaşmak üçin arzany awtoryň özi ýa-da ony bäsleşige hödürleýän gurama berip biler. Bäsleşigiň milli tapgyryna gatnaşmak üçin «Bosfor» guramasyndan alnan onlaýn-formany doldurmaly, şeýle hem ol ýa-da beýleki materialy bäsleşikde ulanmak üçin razylyk berýän awtordan razylyk haty we redaksiýadan rugsat hatyny goşmaly. Bäsleşige hödürlenilýän materialy elektron görnüşde ibermeli ýa-da internetden neşir edilen makalanyň salgysyny goşmaly.
Bäsleşik üçin arzalary tabşyrmagyň soňky möhleti – 2019-njy ýylyň 10-njy awgusty.
Milli tapgyryň ýeňijileri žurnalistika ulgamyndan tejribeli emin agzalary tarapyndan kesgitleniler. Her ugur boýunça final tapgyra gatnaşmak üçin 3 adam saýlanar. Final tapgyra çykanlaryň ählisi 2019-njy ýylyň sentýabrynda Duşenbe şäherinde geçiriljek Merkezi Aziýa Mediafestiwalynyň çäklerinde geçiriljek ýeňijileri sylaglamak dabarasyna çagyrylar.
Sebit tapgyrynda materiallara ýörite halkara emin agzalary — gatnaşyjy ýurtlaryň hersinden iki sany media ulgamyň wekilleri baha berer.