Awazada Türkmenistanda ilkinji gezek halkara awtomobil sergisi geçiriler

2019-njy ýylyň 11-12-nji awgustynda Türkmenbaşy şäherindäki Halkara deňiz portunda Hazar innowasion tehnologiýalarynyň sergisiniň çäginde «Türkmensährasy-2019» atly halkara awtomobil sergisi geçiriler.
Türkmenistanda ilkinji gezek geçirilýän «Türkmen Sährasy-2019» halkara awtosergisi «Türkmenawtoulaglary» agentligi, Türkmenistanyň Içeri işler ministrligi hem-de Türkmenistanyň Söwda-senagat edarasy tarapyndan gurnalýar. Dünýäniň awtomobil ulgamynyň iri kompaniýalary we görnükli hünärmenleri bu sergä gatnaşarlar.
Sergide awtomobil gurluşygy ulgamynda iň soňky gazanylanlar we innowasion tehnologiýalar hödürleniler. Hususan-da, bu görkezilişde awtomobilleriň iň täze nusgalary, ýeňil hem ýük awtoulaglar üçin ätiýaçlyk şaýlary, ýöriteleşdirilen tehnikalar görkeziler. Şeýle hem sergide ulaglary abatlamak hem-de olara hyzmat etmek üçin enjamlar, awtomobilleriň şaýlaryny öndürmek üçin serişdeler, degişli düzüm bölekleri görkeziler.
Awtosergi 5400 inedördül metr meýdany tutýar. Bu ýerde 120 sany awtomobil ýerleşip biler. Serginiň geçirilmeginiň esasy maksady Türkmenistanda awtomobil gurluşygy pudagyny emele getirmek we oňa innowasion çözgütleri ornaşdyrmak bolup durýar. Serginiň çäklerinde işewür duşuşyklary we gepleşikleri geçirmek meýilleşdirilýär.
Sergi barada goşmaça maglumaty http://www.turkmensahrasy-2019.com saýtyndan alyp bolar.