Türkmenistanda parolyňy girizmesiz töleg tehnologiýaly ilkinji kartlar peýda boldy

«Rysgal» paýdarlar-täjirçilik banky «Mastercard» transmilli maliýe korporasiýasy bilen bilelikde Türkmenistanda kartyňy galtaşdyrmasyz töleg tehnologiýaly ilkinji plastik kartlarynny çykardy. Bu barada ORIENT habarlar agentligi habar berýär.
Ýörite tehnologiýa tölegi parolyňy girizmezden kartyňyzy diňe bir gezek terminala degirmek arkaly amal etmäge mümkinçilik berýär. Bu tehnologiýa ýerine ýetirilýän töleg amallarynyň amatlylygyny we howpsuzlygyny üpjün edýär. Kartyňy hatda gapjykdan çykarmak hem zerur däl. Bu şeýle hem siziň wagtyňyzy tygşytlamaga ýardam eder, çünki töleg amallary bada-bat ýerine ýetirilýär.
Täze plastik kartlar tapgyrlaýyn ýagdaýda çykarylar — her tapgyrda goşmaça täze hyzmat giriziler.
Ilkinji tapgyrda, «Mastercard Maestro» milli kartlary çykarylar. Bu kartlar diňe Türkmenistanyň çäginde hereket edip, dürli amallary milli walýutada ýerine ýetirer. «Rysgal» PTB bu hili kartlary müşderilerine eýýäm şu günden hödürleýär. Eýesiniň aýlyk zähmet karty geçirilýän kartlary awtoulaglara, aragatnaşyk hyzmatlaryna töleg etmekde, şeýle hem söwda nokatlarynda söwda etmekde peýdalanyp bolar.
Geljekde ýörite programmalaryň kömegi bilen kartyň eýeleri harytlary satyn alandyklary ýa-da ýurduň supermarketlerinde, söwda-dynç alyş merkezlerinde bu hyzmatdan peýdalanandyklary üçin belli bir bonus-toplanma ýygnap bilerler.
Indiki tapgyr — «Mastercard Standart», «Mastercard Gold», «Mastercard Platinum» walýuta kartlary çykarylar. Bu kartlar dünýä boýunça dürli töleg amallaryny ýerine ýetirmäge mümkinçilik berer. Bu kartlar Internet arkaly harytlary sargamaga we olara töleg etmäge, myhmanhanalarda otag bellemäge we syýahatlary gurnamaga, howa menzilleriniň biznes-zallaryna girmäge, harytlar üçin arzanladyş programmalaryndan peýdalanmaga we beýleki hyzmatlara elýeterlilik berýär.
«Mastercard» kartlarynyň ähli görnüşlerinde internet-banking hyzmaty bolar. Bu hyzmat arkaly kartyň eýesi islendik wagt balansyny barlap, kartdaky amallary görüp bilýär, hyzmatlary dolandyryp bilýär.
«Berkarar» söwda-dynç alyş merkeziniň myhmanlary gipermarketiň käbir dükanlarynda «Mastercard» kartlarynyň işini barlamaga mümkinçilik aldylar.