2020-nji ýylda Medeniýet hepdeligi Daşoguz welaýatynda geçiriler

2020-nji ýylyň 22 — 27-nji iýuny aralygynda Daşoguz welaýatynda Medeniýet hepdeligi geçiriler. Türkmenistanyň Prezidenti ýakynda geçirilen hökümet mejlisinde degişli Karara gol çekdi. Resminamada bellenilişi ýaly, bu karara Garaşsyz, hemişelik Bitarap Türkmenistan döwletimizde medeniýeti, aýdym-saz, teatr, kino hem-de şekillendiriş sungatyny, telewideniýäni, radiony, metbugaty, neşirýat ulgamyny, kitaphanalary, muzeýleri we medeni-dynç alyş edaralaryny ösdürmek, döredijilik işgärlerini ylham dünýäsine ruhlandyrmak, şeýle hem Medeniýet we sungat işgärleriniň hem-de Magtymguly Pyragynyň şygryýet güni mynasybetli ýurdumyzda asylly däbe öwrülen Medeniýet hepdeliklerini türkmen halkynyň milli toýlaryna mahsus görnüşde şatlyk-şowhunly, ýokary derejede geçirmek maksady bilen gol çekildi. Şeýle hem bu hepdeligi geçirmek boýunça guramaçylyk topary döredildi we onuň düzümi tassyklanyldy.
Medeniýet ministrligine, Telewideniýe, radiogepleşikler we kinematografiýa baradaky döwlet komitetine, Türkmen döwlet neşirýat gullugyna we Daşoguz welaýatynyň häkimligine Medeniýet hepdeliginde sungatyň, çeper döredijiligiň görnüşleri boýunça medeni çäreleriň geçirilmegini we köpçülikleýin habar beriş serişdelerinde giňden beýan edilmegini üpjün etmek tabşyryldy.
Belläp geçsek, şu ýyl Medeniýet hepdeligi 22-nji iýunda Balkan welaýatynda badalga aldy. Medeniýet hepdeligi Türkmenistanda medeniýet ulgamynda amala aşyrylýan özgertmeleri giňden beýan etmek, döredijilik işgärleriniň hünäriniň ýokarlandyrylmagyna, sungatyň ösdürilmegine we onuň görnüşleriniň artdyrylmagyna ýardam bermek, medeni diplomatiýany ilerletmek hem-de bu ulgamda halkara gatnaşyklary ösdürmek ýaly wezipeleri çözmäge gönükdirilendir.