Serdar Berdimuhamedow Ahal welaýatynyň häkimi wezipesine bellenildi

Türkmenistanyň Prezidentiniň gol çeken Karary bilen, Serdar Gurbangulyýewiç Berdimuhamedow Ahal welaýatynyň häkimi wezipesine bellenildi diýip, "Watan" habarlar gepleşigi habar berýär. Bu wezipä geçmegi bilen ol, welaýat häkiminiň orunbasary wezipesinden boşadyldy.
38 ýaşly S.Berdimuhamedow hünäri boýunça hem oba hojalykçydyr. Ol 2001-nji ýylda Türkmen oba hojalyk uniwersitetini tamamlady. Ol 2011-nji ýylda Russiýanyň Daşary işler ministrliginiň Diplomatik akademiýasyny, şondan iki ýyl soňra Ženewanyň syýasy howpsuzlyk merkeziniň ýörite maksatnamasyny üstünlikli tamamlap, halkara gatnaşyklary boýunça hünärmen - diplomat bolup ýetişdi. Ol diplomatika boýunça ukybyny we başarjaňlygyny Türkmenistanyň Daşary işler ministrliginde işlän ýyllarynda hem görkezdi.
Serdar Berdimuhamedow şu ýylyň ýanwar aýynda Ahal welaýatynyň häkiminiň orunbasary wezipesine bellenildi.
Türkmenistanyň Prezidentiniň gol çeken resminamasyna laýyklykda, Ahal welaýatynyň häkiminiň orunbasary wezipesine Hojageldi Hojageldiýew bellenilip, ol Ahal welaýatynyň Sarahs etrabynyň häkimi wezipesinden boşadyldy.