Aşgabadyň çäginde täze şäheriň taslamasy tamamlaýjy tapgyrda alnyp barylýar

10-njy iýunda Türkmenistanyň Prezidentiniň sanly wideoaragatnaşyk arkaly geçirilen iş maslahatynda Aşgabat şäheriniň häkimi Ş.Durdulyýew Aşgabat şäheriniň çäklerinde täze şäheri gurmak boýunça alnyp barylýan işler, hususan-da, döwrebap, tehnologiýalar hem-de innowasiýalar esasynda bina ediljek şäheriň taslamasyny taýýarlamak boýunça işleriň tamamlaýjy tapgyrda alnyp barylýandygy barada hasabat berdi.
Prezident Gurbanguly Berdimuhamedow hasabaty diňläp, ak mermerli Aşgabady maksada laýyk ösdürmegiň möhüm ugurlaryna ünsi çekdi. Şunda milli Liderimiz ekologiýa ýagdaýyna, arassaçylygyň we düzgün-tertibiň pugta berjaý edilmegine, köp babatda adamlaryň durmuşynyň hilini kesgitleýän şäher gurşawyny kämilleşdirmäge yzygiderli gözegçilik etmegiň wajypdygyny belledi.
Döwlet Baştutany täze şäheriň taslamasynyň taýýarlanylyşy babatda häkimden bu ugurda görülýän çäreleri işjeňleşdirip, meýilleşdirilen desgalaryň öz wagtynda tamamlanmaly möhletini we gurluşygyň hilini üpjün etmegi talap etdi.
Şeýle-de, milli Liderimiz Aşgabadyň demirgazygynda ýerleşjek täze şäheriň taslamasynda ähli zerur şertleriň nazara alynmagynyň wajypdygyny aýdyp, bu işi çaltlandyrmak barada häkime anyk tabşyryklary berdi.