Türkmenistan «Home Textiles Sourcing Expo 2019» sergisine gatnaşar. Serginiň direktory Jennifer Bekonyň bellemegine görä, «öý hojalyk dokmasy bazarynda dünýäde öňdebaryjy bolmak bilen biz bu sergide dürli döwletleriň önümlerini hödürlemäge şatdyrys. Pudaklaýyn sergiler dogrusynda gürrüň edilende, amerikan sarp edijileri ýerli hem-de daşary ýurtlaryň önümleriniň bolmagyny talap edýärler. Biz hem «Home Textiles Sourcing Expo 2019» sergisine tutuş dünýäden rekord möçberdäki gatnaşyjylaryň boljakdygyny habar bermäge şatdyrys». Bu barada ORIENT agentligi habar berýär.
22-24-nji iýulda Nýu-Ýorkda geçiriljek sergä şu ýyl ilkinji gezek Türkmenistan gatnaşar. Ýurdumyzyň dokma senagatynyň öňdebaryjy kärhanalary ýatalga, hammam, aşhana we naharhana egin-eşikleri, şeýle hem halylar ýaly kategoriýalar boýunça öý üçin niýetlenen önümlerini hödürlärler.
2019-njy ýylyň ýanwar-mart aýlarynda türkmen dokma önümleriniň dürli görnüşleriniň eksporty 37,5 %, taýýar önümleriniň eksporty – 68,6 % artdy. Şu ýylyň bäş aýynda Dokma senagaty ministrligi boýunça önümçiligiň ösüş depgini 153,9 göterime deň boldy.
«Home Textile Sourcing Expo» — «Messe Frankfurt» bilen «CCPIT-TEX-iň» uzakmöhletleýin taslamasydyr. Belläp geçsek, ýakynda meşhur Frankfurt ýarmarkasynyň wekilligi Aşgabatda açyldy.
Türkmenistan Nýu-Ýorkda geçiriljek dokma önümleriniň sergisine gatnaşar
- 10.06.2019 00:21
- 3.6k+
