Hytaýda mobil aragatnaşygyň 5G nesli peýdalanylyp başlandy

Hytaýyň senagat we maglumat tehnologiýalary ministrligi milli operatorlaryna mobil aragatnaşygynyň 5G neslini köpçülikleýin peýdalanmaga rugsat berdi, diýip ORIENT agentligi «China daily» gündelik hytaý gazetine salgylanyp habar berýär. Bu operatorlara «China Mobile», «China Telecom» we «China Unicom», şeýle hem «China Broadcasting Network» döwlet korporasiýasy degişli. Munuň özi 5G-den peýdalanmaklyga tarap ädimi aňladýar.
Senagat we maglumat tehnologiýalary ministri Mýao Weýiň belleýşi ýaly, Hytaý öz 5G bazaryny emele getirmeklige işjeň gatnaşýan daşary ýurt kompaniýalaryny goldaýar. 5G — rewolýusion ýokary tizlikli tehnologiýa bolup, onuň kömegi bilen maglumatlar 4G garanyňda, azyndan, 10 esse tiz geçiriler.
Mobil aragatnaşygynyň ählumumy ulgamynyň çaklamagyna görä, 5G-den peýdalanýan 460 million ulanyjysy bilen Hytaý 2025-nji ýylda bu ugurda dünýäde iri bazara öwrüler. China Mobile-yň bellemegine görä, sentýabryň ahyryna çenli 5G hyzmatlary Hytaýyň 40-dan gowrak şäherlerinde elýeterli bolar. Onuň bellemegine görä, 5G-niň ygtyýarlandyrylmagy Hytaýyň kiber döwlete öwrülmeginden esasy ädim bolar we telekommunikasiýa ulgamynda bäsdeşlikde ýeňmegine ýardam eder.
Telekommunikasiýa enjamlaryny öndüriji bolan «Huawei Technologies Co» hem 5G-ni köpçülikleýin ýaýratmakda Hytaýa ýardam etmäge taýýardygyny mälim etdi. 2009-njy ýyldan bäri Huawei 5G boýunça barlaglary geçirmeklige 2 milliard dollardan gowrak maýa goýum sarp etdi.
2019-njy ýylyň maý aýyna çenli ýagdaýa görä, dünýäniň 28 kärhanasy 5G ulgamyň standartlary üçin patent almak üçin arza berdi. Bu arzalaryň 30 %-i hytaý kärhanalarynyň paýyna düşýär.