Aşgabatda «SAP SE» nemes kompaniýasynyň önümleriniň sergisi geçiriler

11-nji iýunda Türkmenistanyň Söwda-senagat edarasynyň maslahatlar zalynda «SAP SE» dünýä belli nemes kompaniýasynyň önümleriniň sergisi geçiriler, diýip TSTB-niň resmi saýty habar berýär.
Bu çäre Türkmenistanyň Senagatçylar we telekeçiler birleşmesiniň agzasy bolan «Turkmen-Tranzit» HJ tarapyndan TSTB-niň goldaw bermeginde gurnalar we döwlet düzüminiň we hususy telekeçileriň wekillerine niýetlenendir. Çäreleriň çäklerinde sanly tehnologiýalary we resminamalaryň elektron dolanyşygyny ornaşdyrmak ulgamynda halkara hyzmatdaşlygy meseleleri boýunça işewür duşuşyklary geçirmek meýilleşdirildi.
Prezentasiýalary we maslahatlary hödürlemek üçin «SAP SE» kompaniýasynyň tejribeli daşary ýurtly bilermenleri gatnaşar. Bu nemes kompaniýasy IT-önümleriniň ygtybarly öndürijisi we sanly ykdysadyýetiň we resminamalaryň elektron dolanyşygynyň taslamasyny durmuşa geçirmekde baý tejribä eýedir.
«SAP SE» — nemes kompaniýasy bolup, ol guramalar üçin maglumat üpjünçiligini öndürýär. Ştab-kwartirasy Waldorfda (Germaniýada) ýerleşýär. «SAP» kompaniýasy IBM öňki bäş sany işgäri tarapyndan döredilipdi. Kompaniýa buhgalterçilik hasaby, söwda, önümçilik, maliýeler, işgärleri dolandyrmak, ammarlary dolandyrmak ýaly kärhananyň içerki prosesleri üçin awtomatlaşdyrylan ulgamy işläp düzýär.