Türkmenistanyň futbol ýygyndysy Ugandanyň ýygyndysy bilen duşuşdy

Türkmenistanyň futbol boýunça milli ýygyndysy Afrika yklymyndan ýygyndy topara garşy ilkinji gezek resmi däl halkara duşuşygyny geçirdi. Uganda döwletiniň ýygyndysy bilen geçirilen duşuşyk 2:0 hasaby bilen ugandalylaryň ýeňşi bilen tamamlandy, diýip Turkmenportal habar berýär.
Bu duşuşyk Türkmenistanyň ýygyndysynyň taryhynda Afrika yklymynyň ýygyndysy bilen ilkinji duşuşykdyr. Häzirki wagta çenli biziň ýygyndy toparymyz diňe Aziýanyň we Ýewropanyň ýygyndy toparlary bilen duşuşyklary geçirýärdi.
Ýatlap geçsek, Ugandanyň milli ýygyndysy bilen FIFA-nyň resmi ýoldaşlyk duşuşygy 9-njy iýunda Abu-Dabide ýerli wagt bilen 20:00-da Nýu-Ýork uniwersitetiniň futbol meýdançasynda geçiriler.
Türkmenistanyň futbol boýunça ýygyndy topary häzirki wagtda Dubaýda (BAE) okuw-türgenleşik ýygynyny geçirýär. Bu ýerde olar AFK zolagynda 2022-nji ýyldaky dünýä çempionatynyň saýlama duşuşyklaryna taýýarlyk görýärler. Türkmen futbolçulary BAE-de 11-nji oýuna çenli bolup, soňra Aşgabada dolanyp gelerler.
Ugandanyň futbol boýunça milli ýygyndysy Gündogar Afrikanyň döwletini — Uganda Respublikasynyň adyndan halkara futbol ýaryşlaryndan we ýoldaşlyk duşuşyklarynda wekilçilik edýär. 1960-njy ýyldan bäri FIFA-nyň agzasy we 1959-njy ýyldan bäri KSF-nyň agzasy bolup durýar. Ýygyndy iň ýokary üstünligini 1978-nji ýylda Afrikan Milletleriniň Kubogynyň final duşuşygyna çykmak bilen gazandy. Ýygyndyny fransuz hünärmeni Sebastýan Dezabre türgenleşdirýär. Ugandanyň ýygyndysy FIFA-nyň reýtinginde 79-njy ýerde durýar.