Türkmen futbol hünärmeni Gurban Berdiýew topar bilen şertnamasynyň möhleti tamamlanmazdan öň kazanyň «Rubin» toparynyň baş tälimçisi wezipesinden boşadyldy, diýip «Biznes Online» rus neşiri habar berýär.
Maglumata görä, tälimçini wezipesinden boşatmak hakynda karar futbol toparynyň ýolbaşçylarynyň we hemaýatkärleriniň bilelikdäki duşuşygynda we möwsümiň netijeleri jemlenende kabul edildi. Toparyň ýolbaşçylary tälimçiniň ýylda 3 mln ýewro alýandygyna garamazdan futbolçylaryň gazanýan netijelerinden we umumy oýnundan närazydylar. Şertnama laýyklykda, türkmen hünärmeni ýene 2 ýyl toparda zähmet çekip bilýärdi.
Gurban Berdiýew «Rubin» toparyna 2001-2013-nji ýyllarda tälimçilik etdi, soňra bolsa 2017-nji ýylda dolanyp geldi. Onuň ýolbaşçylygynda topar 478 duşuşyk geçirdi (208 ýeňiş, 140 deňme-deň, 130 ýeňliş). Kazanyň «Rubini» bilen Gurban Berdiýew 2008-nji we 2009-njy ýyllarda Russiýanyň çempionatynda ýeňiji boldy, şeýle hem 2011/2012 ýyllaryň möwsüminde Russiýanyň Kubogyny almagy başardy.
Tatarystanyň kluby 2018/2019-njy ýyllaryň möwsüminde Russiýanyň çempionatyny 36 utuk bilen 11-nji ýerde tamamlady. Bu görkeziji toparyň RPL-e düşeni bäri iň ýaramaz netijesidir.
Gurban Berdiýew kazanyň «Rubininiň» baş tälimçisi wezipesinden boşadyldy
- 06.06.2019 06:59
- 6.8k+
