Ýaş türkmenistanly robot ýygnaýjylary ABŞ-daky «Genius» olimpiadasyna gatnaşýarlar

Türkmenistandan ýaş robot ýygnaýjylar Ahmet Akyýew we Ahmet Amanow 17-22-nji iýun aralygynda ABŞ-nyň Oswego şäherinde geçiriljek «Genius» halkara ýöriteleşdirilen olimpiadasyna öz taslamalaryny hödürlärler, diýip ORIENT agentligi habar berýär.
Himiýa mugallymlary Atamyrat Şahanowyň ýolbaşçylygynda mekdep okuwçylary tarapyndan oýlanyp tapylan robot dünýä derejeli özboluşly taslamadyr. Ol ýangyn bolýan ýerlerden adamlary halas etmek üçin işlenip düzülipdir we şol ýerleri hereket etmek üçin päsgelçilik berýän predmetlerden arassalamaga ukyplydyr.
ABŞ-da geçiriljek olimpiadada dünýäniň dürli künjeginden gelen ýaş zehinler birnäçe tapgyry başdan geçirerler we tejribeli eminlere öz taslamalaryny hödürlärler. Ýeňijini saýlamakda esasy üns taslamanyň ekologiýalylygyna, durnukly ösüş bilen baglylygyna we döredijilikli düzüjilerine berler.
Ahmet Akyýew eýýäm birnäçe halkara bäsleşikleriniň ýeňijisi bolmagy başardy. Ol Hytaýda 2019-njy ýylda geçirilen ýaş zehinleriň taslama bäsleşiginde bürünç medala, Meksikada geçirilen «First Global» halkara robot bäsleşiginde bolsa ýeňiji bolmagy başardy.