Türkmenistanda demir ýol petekleri onlaýn satylyp başlandy

“Türkmendemirýollary” agentliginiň resmi sahypasyndan elektron biletleri onlaýn satyn almak mümkinçiligi ýola goýuldy, diýip Türkmenistanyň Senagat we kommunikasiýa ministrliginiň “Türkmendemirýollary” agentliginiň resmi saýty habar berýär.
Ýolagçylar öz mobil telefonlaryna gurnalan "Türkmendemirýollary" agentligi programmasynyň kömegi ýa-da railway.gov.tm internet saýtyna girmek arkaly syýahat etmek isleýän wagtynda, şeýle hem syýahat etmek isleýän ugruna elektron biletleri satyn alyp bilerler. Biletleriň tölegini "Altyn Asyr" töleg kartlary arkaly amala aşyrmak göz öňünde tutulan.
"Türkmendemirýollary" agentligi şeýle hem Android we iOS ulgamlary üçin niýetlenilen programmalary ulanyjylara hödürledi. Programmalar arkaly elektron biletleri satyn almak bilen birlikde syýahat edilen ähli biletleri telefonyňyzda saklamak mümkin. Programmanyň Android telefonlary üçin niýetlenen görnüşini PlayMarket-den ýükläp almak mümkindir, iOS telefonlary üçin niýetlenen görnüşi häzirki wagtda işlenip düzülýär.
Ýylyň başynda «Türkmenpoçta» poçta aragatnaşyk kompaniýasy paýtagtyň ýaşaýjylary üçin täze hyzmaty girizdi, ýagny Aşgabatdaky poçta aragatnaşyk bölümlerinde ähli ugurlar boýunça demir ýol gatnawlary üçin petekleri satyn almak mümkin edildi. "Türkmendemirýollary" agentligi her ýyl takmynan 6 million ýolagça hyzmat edýär.
Agentligiň "Ýolagçy" bölüminde 5000 hünärmen zähmet çekýär. Hyzmatymyza türkmen sährasynyň ajaýyp peýzažynyň lezzetini duýmak isleýän dünýä jahankeşdelerinden we ýerli ýolagçylardan gelýän hoşallyk teswirleri agzybir işgärlerimizi has hem ruhlandyrýar. Agentligiň resmi saýtynda (http://www.railway.gov.tm/passengers) biletleriň bahasy, el we ýan goşlaryň düzgüni we elektron biletlerden peýdalanmagyň usuly hakynda ýolagçylar tarapyndan köp soralan esasy soraglaryň jogaplary berlen. Gerek maglumaty tapyp bilmedik ýagdaýyňyzda "089" belgisine jaň etmek arkaly habarlaşyp bolar.