Şäherara awtobuslary üçin petekleriň onlaýn-satuwy ýola goýuldy

Aşgabatdaky ýolagçy awtoulag önümçilik birleşigi: we «Türkmenaragatnaşyk» agentliginiň «Türkmenpoçta» kompaniýasy awtomenzil.gov.tm saýtynyň üsti bilen awtobus peteklerini satyn almak üçin onlaýn-hyzmatlary girizdiler. Şäherara awtobus gatnawlary üçin petekleri indi kassadan, mobil telefonlarynyň ýa-da öz-özüňe hyzmat ediş terminallarynyň üsti bilen satyn almak mümkin, diýip «Türkmenistan: Altyn asyr» elektron gazeti habar berýär.
Awtobuslar üçin onlaýn-petekleri on gün öňünden satyn almak indi diňe bir amatly bolman, eýsem, örän ýeňildir. Jemgyýetçilik ýerlerinde — şäher awtomenzillerinde, bazarlarynda, söwda merkezlerinde we beýleki ýerlerde oturdylan terminallarda goşmaça hyzmat düwmejigi peýda boldy. Ondan peýdalanmak üçin müşderi menýunyň ýa-da terminalyň ýüzündäki gözleg setiriniň üsti bilen gitjek ýerini, senesini we wagtyny saýlamaly, ulgamyň talap edýän rekwizitlerini girizmeli. Petek üçin tölegi geçiren badyňyza siz awtobus üçin elektron petek alarsyňyz.
Mobil telefonynyň ýa-da kompýuteriň üsti bilen petek satyn almak üçin «Altyn asyr» bank kartlaryndan peýdalanmak bolar. Munuň üçin telefonyň eýesi öz telefon belgisini, pasport maglumatlaryny, gitjek senesini girizmeli. 
Operator tarapyndan degişli talapnama işlenilenden soňra, girizilen telefon belgä elektron petek iberiler. Awtobusa münülende sürüjä elektron petegi çap edip görkezmek hökman däl, oňa diňe pasportyňy görkezmek ýeterlikdir. Uzak aralyklara gatnaýan awtobuslaryň ählisi POS-terminallary bilen enjamlaşdyrylar. Olaryň kömegi bilen gatnawyň töleginiň geçirilendigi awtomatik ýagdaýda barlanylar.