Türkmenistanyň milli ýygyndysy 1-nji iýunda açyk türgenleşik geçirer

Bilşiňiz ýaly, häzirki wagtda futbol boýunça Türkmenistanyň milli ýygyndysy horwatiýaly tälimçi Ante Mişeniň ýolbaşçylygynda 2022-nji ýylda geçiriljek dünýä çempionatynyň saýlama tapgyrynyň taýýarlygynyň çäginde paýtagtymyzda okuw-türgenleşik ýygnanyşygyny geçirýär. “Aşgabat” köpugurly stadionynyň türgenleşik meýdanynda 26-njy maýda badalga berlen türgenleşik ýygnanyşygy 2-nji iýuna çenli dowam eder.
Milli ýygyndymyzyň tälimçiler düzümi 1-nji iýunda geçiriljek türgenleşik ýygnanyşygynyň metbugatyň işgärleridir janköýerler üçin açyk görnüşde geçirýändiklerini mälim etdiler.
Şol sebäpli-de, milli ýygyndymyzyň “Aşgabat” köpugurly stadionynyň ot örtükli türgenleşik meýdanynda geçirjek okuw-ýygnanyşygyna gatnaşmaga isleg bildirýän žurnalistleri hem-de futbol janköýerlerini işjeň gatnaşmaga çagyrýarys. Açyk türgenleşigiň yzysüresi isleg bildiren žurnalistlere milli ýygyndymyzyň oýunçylarydyr tälimçiler düzümi bilen söhbetdeşlik geçirmäge mümkinçilik dörediler.
Milli ýygyndymyzyň 1-nji iýundaky türgenleşik ýygnanyşygy 19:00-da başlanar.
Ýeri gelende aýtsak, dünýä çempionaty – 2022-niň AFK yklymyndaky saýlama tapgyryna 5-nji sentýabrda badalga berler. Türkmenistanyň milli ýygyndysynyň saýlama tapgyrdaky garşydaşlary 17-nji iýulda geçiriljek bije çekişlikde belli bolar.
Horwatiýaly tälimçi Ante Mişeniň ýolbaşçylygynda milli ýygyndymyzyň deslapky ýygnanyşygy 26-njy maý – 3-nji iýun aralygynda paýtagtymyzda geçiriler. Şondan soň ýygyndy toparymyz BAE-niň Dubaý şäherine ugur alar. Ante Mişeniň tälim berýänleri Dubaýda Afrika yklymyna wekilçilik edýän ýygyndylaryň ikisi– Jibutiniň (5-nji iýun) hem-de Ugandanyň (9-njy iýun) milli ýygyndylary bilen ýoldaşlyk duşuşygyny geçirer. Ýygyndy toparymyzyň BAE-däki okuw-türgenleşik ýygnanyşygy 3-11-nji iýun aralygynda geçiriler.