Ýylyň iň gowy halylary yglan edildi

Türkmen halysynyň milli muzeýinde Türkmenistanyň halyçylyk kärhanalarynyň arasynda geçirilýän bäsleşigiň ýeňijilerini sylaglamak dabarasy geçirildi, diýlip ORIENT agentligi habar berýär. Türkmen halysynyň baýramy mynasybetli her ýylda geçirilýän bu bäsleşik milli halyçylyk sungatyny gorap saklamaga we ösdürmäge gönükdirilendir.
Bäsleşikde baş baýraga Türkmen halysynyň milli muzeýiniň «Arşyň nepisligi» atly halysy mynasyp boldy. Ony bütin ýylyň dowamynda muzeýiň halyçylary dokadylar. Beýleki baýrakly orunlary ýurdumyzyň sebitleriniň çeper halyçylyk kärhanalary eýelediler. Olaryň hatarynda Esenguludan (Balkan welaýaty), Halaçdan (Lebap welaýaty) halyçylaryň el işleri bar.
Bäsleşigi gurnaýjylaryň bellemegine görä, 23 sany işiň arasyndan nepisligi, gölleriniň deň ýerleşdirilmegi, reňk sazlaşygy hem-de beýleki şertleri boýunça iň naýbaşylary saýlanylyp alyndy.
Türkmen halylary bütin dünýäde deňsiz-taýsyz gözelligi, inçeden nepisligi, göllere baýlygy bilen meşhurdyr. Türkmen halyçy zenanlaryny el işlerine agyr zähmeti sarp edýärler, çünki haly dokamak sabyrlylygy hem-de janypkeşligi talap edýär. Halyçylyk bilen meşgullanmak aýratyn başarnygy talap edýär. Mysal üçin, bir gölden beýlekisine çenli aralygy dogry kesgitlemek üçin, matematiki nukdaýnazardan dogry hasaplamagy başarmak gerek.