Türkmenistanda telekeçilik boýunça täze ýokary okuw mekdebi açylar

Türkmenistanda hususy pudagy işgärler bilen üpjün etmek üçin bazar ykdysadyýetiniň ýokary derejeli hünärmenlerini taýýarlaýan ýokary okuw mekdebini döretmek boýunça işler alnyp barylýar. Bu barada sanly wideoaragatnaşyk arkaly geçirilen hökümet mejlisinde habar berildi. Wise-premýer Ç.Gylyjowyň hasabatyna görä, täze ýokary okuw mekdebiniň taslamasy Senagatçylar we telekeçiler birleşmesi tarapyndan ýurdumyzyň Bilim ministrligi bilen bilelikde işlenip taýýarlanylýar.
Prezident Gurbanguly Berdimuhamedow ýurdumyzda kiçi we orta işewürlik kärhanalarynyň sanynyň, telekeçilik düzümleriniň barha köpelýändigini belledi. Şoňa görä-de, menejment, marketing hem-de beýleki ugurlar boýunça hünärmenleri hünär taýdan taýýarlamaga degişli täze ýokary okuw mekdebiniň açylmagy döwrüň talabydyr. Döwlet Baştutany dünýä derejesinde gözýetimi, strategik pikirlenişi hem-de durmuş taýdan jogapkärçiligi bolan, jemgyýetimiziň we ýurdumyzyň ösmegine uly goşant goşmaga ukyply halkara derejeli işewürleri kemala getirmegiň zerurdygyny aýtdy hem-de bu möhüm taslamany durmuşa geçirmek boýunça anyk tabşyryklary berdi. Milli Liderimiz öňdebaryjy tehnologiýalary we okatmagyň usullaryny peýdalanmak, tejribeli mugallymlary çekmek bilen, işewürlik biliminiň innowasion gurşawynyň döredilmegine ünsi çekdi.
ORIENT habarlar agentliginiň bellemegine görä, deslapky taslama boýunça telekeçilik boýunça ýokary okuw mekdebinde 6 fakultet, 17 kafedra we dil bölümi bolar. Ykdysadyýetiň şu günki hem-de geljekki talaplaryna laýyklykda, 25 hünär göz öňünde tutulýar. Geljekde olar hem has giňeldilip bilner. Biznes-bilimiň uniwersallygy hakyndaky pikir täze ýokary okuw mekdebiniň taslamasyna ilkibaşdan goşulandygy üçin bu edaranyň uniwersitet statusyny almagy mümkin. Şeýle hem türkmen we iňlis dillerinden başga-da, dünýäde has köp isleg bilidirilýän we telekeçilikde zerur bolan beýleki daşary ýurt dillerini hem öwretmek göz öňünde tutulýar. Bazar ykdysadyýeti boýunça ýokary okuw mekdebinde bilim almak tölegli esasda bolup, onuň okuw maksatnamalary öňdebaryjy tehnologiýaalara we usullara, halkara standartlaryna we dünýäniň bu ugurdaky ýörelgelerine esaslanar. Ylalaşmak hem-de tassyklamak boýunça zerur işlerden soňra, täze ýokary okuw mekdebi ilkinji talyplaryny eýýäm indiki okuw ýylyndan kabul edip biler.