1-nji iýunda ABŞ-nyň Türkmenistandaky ilçihanasy «Kosmosy özleşdirmek we ylmy we taryhy» atly filmleriň we surat sergileriniň görkezilişini gurnaýar. Bu barada ORIENT habarlar agentligi habar berýär.
Tomsuň ilkinji gününde Lebap welaýatynyň ýaşaýjylary tematiki surat sergisine, «WALL-I» multfilmine, şeýle hem «Aýdaky adam» we «Gizlin figuralar» atly kinofilmleriň rus dilinde görkezilişine syn edip bilerler. Görkezilişler Türkmenabat şäherindäki S.Seýdi adyndaky döwlet sazly-drama teatrynda geçiriler.
«Pixar» studiýasynyň gysgametražly «WALL-I» multfilmi dolymetražly iň gowy animasion film hökmünde OSKAR baýragyna mynasyp bolupdy. «Aýdaky adam» we «Gizlin figuralar» kinofilmleri bolsa — iň gowy film we ses boýunça abraýly kino baýraklaryna hödürlenipdi.
2-nji iýunda medeni maksatnama paýtagtymyzdaky «Aşgabat» kinoteatrynda, 2-3-nji iýunda bolsa — Mary welaýatynyň Kemine adyndaky döwlet drama teatrynda görkeziler.
8-9-njy iýunda amerikan kinofilmleriniň we surat sergisiniň görkezilişi Daşoguz welaýatyndaky N.Andalyp adyndaky döwlet sazly-drama teatrynda dowam eder.
14-15-nji iýunda medeni maksatnama Balkan welaýatynyň Balkanabat şäherindäki S.Türkmenbaşy adyndaky döwlet drama teatrynda, 16-njy iýunda bolsa, Türkmenbaşynyň nebiti gaýtadan işleýän zawodlar toplumynyň Medeni-sport toplumynda görkeziler.
Amerikanyň diplomatik wekilhanasy şular ýaly kinogörkezilişlerini yzygiderli gurnaýar. Soňky gezek şular ýaly görkezilişler şu ýylyň fewralynda geçirildi.
