2019-njy ýylyň ortalaryndan başlap, türkmenistanlylar ýerli routerleri satyn alyp bilerler, olar import edilýän analoglaryndan amatly bahadan satylar. Kassa enjamlaryny we töleg terminallaryny öndürmek bilen meşgullanýan «Berk ojak» hojalyk jemgyýeti türkmen routerlerini öndürmegi meýilleşdirýär. Bu barada centralasia.news saýty habar berýär.
2018-nji ýylyň ýanwaryndan bäri, kärhananyň hünärmenleri ilkinji ýerli bank töleg terminallarynyň (POS-terminallaryň) we beýleki töleg çözgütleriniň önümçiligini ýola goýdy. Ýurdumyzyň çäginde söwda merkezlerinde nagt däl görnüşinde hasaplaşmak üçin terminallar we kassa apparatlary bu kärhananyň hünärmenleriniň zähmetiniň netijesidir.
Maglumata laýyklykda, halkara tejribesiniň öwrenilmegi we kompaniýanyň inženerleriniň, programmistleriniň we dizaýnerleriniň bilelikde işlemeginde terminal üçin ýöriteleşdirilen programma üpjünçiliginiň işlenip düzülmegi bu önümiň öndürilmegine esas bolupdyr.
Ilkibaşdan, bu kärhananyň işi önümçiligiň doly toplumyny öz içine almak ýörelgesi esasynda gurnaldy. Ýagny, POS-terminallary we töleg çözgütlerini öndürmekden we ibermekden başlap, Türkmenistanyň çäginde olara doly hyzmat edişi amala aşyrmaklygy öz içine aldy.
Özbaşdak önümçiligi ýola goýmak netijeli boldy we import önümlerine bäsdeşlik etmäge mümkinçilik berdi. Bu önümleriň özüne düşýän gymmaty hem birnäçe esse arzan boldy. Bu önüme daşary ýurtlardan hem gyzyklanmalar dessine peýda boldy. Russiýa, Gazagystan, Katar, Eýran bilen POS-terminallary eksport etmeklige şertnamalar baglaşylýar. Maglumata görä, kärhana ýylda 3-4 müň sany önüm öndürmäge ukyplydyr.
