Sport24 rus neşiriniň habar berşi ýaly, Kazanyň «Rubin» toparynyň baş tälimçisi Gurban Berdiýew möwsüm tamamlanandan soňra, öz islegi boýunça tälimçilikden aýrylar. Maglumatlara görä, 2019-njy ýylyň 20-nji maýynda Russiýanyň Premýer ligasynyň 29-njy tapgyr duşuşygynda «Anži» toparyna garşy oýun «Rubiniň» Gurban Berdiýewiň tälimçiliginde öz öýünde oýnajak iň soňky oýny bolar. 26-njy maýda «Rubin» 30-njy tapgyr duşuşykda «Krasnodaryň» öýünde iň soňky oýnuny oýnar. Russiýanyň Premýer ligasynyň tablisasynda «Rubin» 35 utuk bilen 10-njy orny eýeleýär.
Türkmen we russiýaly futbol tälimçisi Gurban Berdiýew 2001-nji ýyldan 2013-nji ýyl aralygynda «Rubine» tälimçilik etdi we 2017-nji ýylda ýene-de bu topara dolanyp geldi. Bu toparyň baş tälimçisi bolup işlän döwründe «Rubin» 2008-nji we 2009-njy ýyllarda Russiýanyň çempionatynda ýeňiji boldy. 2011/12 möwsümde Russiýanyň Kubogyny eýeledi.
Aşgabatda dünýä inen Gurban Berdiýew 2019-njy ýylyň mart aýynda Türkmenistana gysga möhletli sapar bilen geldi. Saparyň çäginde G.Berdiýew Sport we ýaşlar syýasaty ministrliginde, Türkmenistanyň Futbol federasiýasynda gepleşikleri geçirdi we ýakyn wagtda hyzmatdaşlyk meýilnamalaryny maslahatlaşdy.
Belli tälimçi saparynyň dowamynda Türkmenistanyň futbol jemgyýetçiligi bilen duşuşdy, «Ahal», «Köpetdag», «Aşgabat» futbol toparlary we ýurdumyzyň ýetginjekler ýygyndysy üçin açyk türgenleşikleri geçdi, şeýle hem Aşgabatdaky Olimpiýa şäherçesine baryp gördi.
