Aşgabatda söwda dükanlarynyň sany artdyrylar

Aşgabatda täze dükanlary gurmagyň taslamalary işlenip düzüldi. Bu barada ýakynda geçirilen hökümet mejlisinde wise-premýer Ç.Gylyjow döwlet Baştutanyna hasabat berdi. Bellenilişi ýaly, Aşgabat şäheriniň häkimligi bilen bilelikde paýtagtymyzda gurulmagy meýilleşdirilýän söwda dükanlarynyň taslamalary täze desgalaryň şäheriň binagärlik aýratynlygy bilen sazlaşygy, ýaşaýyş jaý toplumlarynyň ilaty üçin amatlylyk derejesi göz öňünde tutulyp taýýarlanyldy.
Azyk we halkyň sarp edýän harytlarynyň giň görnüşleriniň bölek söwdasynyň guraljak söwda dükanlary häzirki zaman enjamlary bilen üpjün ediler. Şolarda hyzmatyň ýokary derejesi ýola goýlar we ilatyň ösen isleglerini kanagatlandyrmak üçin zerur şertler dörediler.
Gurbanguly Berdimuhamedow söwda edaralarynyň ilatly ýerleriň esasy düzümleriniň biridigini belledi. Hut şonuň üçin hem sazlaşykly ösýän paýtagtymyzda söwda dükanlarynyň sany şäher ilatynyň isleglerine laýyk derejede we amatly ýagdaýda artdyrylmalydyr.
Türkmenistanyň Prezidenti döwrebap dükanlaryň diňe bir söwda desgalary däldigini, şolarda amatlylygyň, ýokary derejeli hyzmatyň ýola goýulmalydygyny, alyjylaryň islegleriniň kanagatlandyrylmagyny, söwdanyň guralyşyna täzeçil çemeleşilmelidigini belledi. Şeýle hem Türkmen Lideri söwda dükanlarynyň daş görnüşiniň hem özüne çekiji bolmalydygyny belläp, taslamalary durmuşa geçirmek babatda wise-premýere birnäçe anyk tabşyryklary berdi.