Mary welaýatynyň Sakarçäge etrabynda ýerleşýän «Ferhar» hojalyk jemgyýetinde azyk bazaryny hususy önümçilikdäki bananlar bilen üpjün etmek boýunça maksatnama üstünlikli ýerine ýetirilýär. Batyrmyrat Orazsähedowyň ýyladyşhanasynda her hepdede süýji tagamly bananlaryň 1,5 tonnasy ýygnalýar. Şu ýyl telekeçi 1800 agaç oturdylan bir gektardan 70 tonnadan gowrak ekzotiki miwe ýygnamagy meýilleşdirýär, diýip «Türkmenistan: Altyn asyr» saýty habar berýär.
Tropiki ösümligi ýetişdirmegiň inçe syrlary bilen Batyrmyrat Türkiýedäki ugurdaş sergide türk telekeçilerinden öwrendi. Şol ýerden hem ol banan palmasynyň ösüntgisini getirdi. Häzirki wagtda onuň hojalygyndaky ekzotiki ösümlikleriň boýy 6 metrden geçýär. Geljek ýyl ol iki esse köp hasyl almagy meýilleşdirýär.
