Türkmenistanyň Prezidentiniň Kararyna laýyklykda, Balkan welaýatynyň Serdar etrabynda täze, döwrebap oba gurlar. Täze oba «Türkmenistanyň Prezidentiniň ýurdumyzy 2019 — 2025-nji ýyllarda durmuş-ykdysady taýdan ösdürmegiň Maksatnamasynda» bellenen wezipeleri üstünlikli durmuşa geçirmek hem-de raýatlaryň ýaşaýyş jaýyna bolan isleglerini kanagatlandyrmak, ilatymyzyň ýaşaýyş derejesini has-da ýokarlandyrmak maksady bilen amala aşyrylýar.
Resminama laýyklykda, Balkan welaýatynyň häkimligine welaýatyň Serdar etrabynda guruljak täze, döwrebap obada binalaryň we desgalaryň gurluşyk işlerini utgaşdyrmak, bu işleriň alnyp barlyşyna gözegçilik etmek hem-de obanyň gurluşygyny tapgyrlaýyn amala aşyrmak tabşyryldy.
Şeýle hem täze guruljak döwrebap obanyň baş meýilnamasyny işläp düzmek hem-de obanyň gurluşyk işlerini iki tapgyrda: 1-nji tapgyryny 2019 — 2022-nji ýyllarda, 2-nji tapgyryny 2022 — 2025-nji ýyllarda amala aşyrmak tabşyryldy.
