Okuw merkezi bilim bermek, hünär derejelerini ýokarlandyryş okuwlaryny geçmek we ýurduň döwlet gullukçylary üçin maslahat sapaklaryny geçmek üçin gönükdirilendir.
Halkara ynsanperwer ylymlary we ösüş uniwersitetinde Okuw-maslahat merkezi açyldy. Merkez ÝB-niň «Erasmus+» — «Administratiw ösüşiň sebit wezipeleri» (ROAD) taslamasynyň esasynda döredildi. Merkeze türkmen tarapyndan Halkara ynsanperwer ylymlary we ösüş uniwersiteti we Türkmen döwlet maliýe instituty gatnaşýar. Bu barada centralasia.news saýty habar berýär.
2017-2018-nji okuw ýylynda badalga alan taslama başlangyjy hyzmatdaş ýokary okuw mekdeplerinde gaýtadan taýýarlaýyş merkezlerini döretmek bilen döwlet gullukçylarynyň hünär derejelerini ýokarlandyrmak ulgamyny goldamaga gönükdirilendir.
ROAD merkezi häzirki zaman enjamlary bilen enjamlaşdyrylyp, zerur bolanda wirtual okuwlary geçmäge hem mümkinçilik bar. Bu ýerde giň kitaphana ulgamy däp bolan görnüşde we elektron görnüşde hödürlenilýär.
