«Mariachi Champana Nevin» ansamblynyň Türkmenistan boýunça çykyşlary Aşgabatda «Watan» kinokonsert merkezinde geçirilen baýramçylyk konserti bilen tamamlandy. Medeni çäräni Türkmenistanyň Medeniýet ministrligi we ABŞ-nyň ilçihanasy gurnady.
Dünýä belli meksikan aýdym saz ussatlary ýurdumyz boýunça ilki Balkanabatda, soňra Türkmenbaşy şäherinde konsert bilen çykyş etdiler.
Aýdym saz agşamynda ilki «El mariaçi» aýdymy ýaňlandy. Dünýäde meşhur bu aýdymyň muşdaklary türkmenistanly diňleýjileri hem biparh goýmady. Mario Sezar Egianyň ýerine ýetirmeginde hemmeleriň söýgüli aýdymy «Besame muço» ýaňlandy.
«Mariachi Champana Nevin» ansamblyna 20 ýyldan gowrak wagt boldy. Şu geçen döwürde sazandalar ABŞ-da, Russiýada, Gazagystanda, Günorta Koreýada we dünýäniň köp sanly döwletlerinde çykyş etdiler.
Konsertde «Aşgabat» estrada orkestri hem çykyş etdi. Türkmen sazandalarynyň «Mariachi Champana Nevin» topary bilen bilelikde ýerine ýetirmeginde meksikan halk sazlary ýerine ýetirildi. Nury Halmämmedowyň «Haýrana galar» sazynyň hem-de «Aýna» türkmen halk sazynyň topar tarapyndan ýerine ýetirilmegi diňleýjiler üçin ajaýyp sowgat boldy.
