«Pari Sen-Žermeniň» (PSŽ) we Fransiýanyň ýygyndysynyň hüjümçisi Kilian Mbappe dünýäde iň gymmat futbolçy boldy diýip, CIES Football Observatory barlag merkezi mälim etdi. Seljerijiler oňa 250,6 mln ýewrolyk futbolçy diýip baha berdiler. Şonuň ýaly-da, öňdelikçileriň üçlügine «Realdan» braziliýaly hüjümçi Winisius Žunior (185,3 mln ýewro) we «Mançester Sitiniň» täze alan futbolçysy — Norwegiýanyň ýygyndysynyň hüjümçisi Erling Holand (152,6 mln ýewro) dagy düşdüler.
Sanawdaky ýene bir iň gymmat goragçy — «Mançester Sitiniň» oýunçysy Ruben Diaşdyr, onuň bahasy 109,6 mln ýewro. «Barselonadaky» Pedri iň gymmat ýarym goragçy boldy (135,1 mln ýewro), «PSŽ-daky» Janluiji Donnarumma bolsa iň gymmat derwezebanlaryň sanawynyň başyny çekdi (73,7 mln ýewro).
Sanawyň birinji ýüzlüginde Angliýanyň premýer-ligasynyň wekilleri agdyklyk edýär (41).
23 ýaşly Mbappe «PSŽ-e» 2017-nji ýylda geldi. Şondan bäri ol dört gezek Fransiýanyň çempionatynda ýeňiş gazandy, üç gezek Fransiýanyň kubogyny aldy, Fransuz ligasynyň kubogynyň we Fransiýanyň Superkubogynyň hersini iki gezekden gazandy. Ol öňki oýnan toparynda — «Monakoda» hem ýurduň çempiony bolupdy. Türgen Fransiýanyň ýygyndysynyň düzümindekä 2018-nji ýylda Russiýada geçen dünýä çempionatynda altyn medala mynasyp bolupdy.